häbet geduld

di flissige läser under öich müesse sech ir nächschte zyt itz de chli gedulde. morn löh mr ds erschte mal üsi beide eltere ufenang los.... :-) u de gömer de uf nes 'reisli' düre süd-öschtliche egge vo ouschtralie: ulladulla - canberra - melbourne - great ocean road - tasmania - sydney. reisebericht folgt....

guetzli session

wiehnachte ohni guetzli u läbchueche isch doch eifach ke richtigi wiehnacht, bsunders we nid ämal ds wätter schtimmt, oder?! :-))

aber das ganze underfange hett sech de schwieriger usegschtellt, als i dänkt ha. nid ds bache, aber ds finde vo de passende zuetate. puahh! irgendwenn hani de mini guetzli wunschlischte müesse apasse und mi mit mailänderli u pfäfferchüechli zfride gäh. uf d brunsli, d zimtschtärne u gwürzschnittli muessi itz no nes jahr warte.










das isch d'obelia, mini assistäntin :-). si isch o architektin u schaffet zäme mit em james.


d'obelia mit üsne pfäfferchüechli. we's nach mier gange wär, wäre si aschliessend grad küderet worde. d'obelia hett zwar gmeint, si fingi se guet. aber das chani immer no nid gloube. di hei ja soooo g'eielet. wääh!!


und hie no d mailänderli. die sie de hingäge super usecho. mmmhhh!!

merry christmas + happy new year 2008

to all our friends, family, loved ones, comrades, colleagues, acquaintances, enemies and lovers


ps: bildli aklicke, falls dr ä lupe bruchet... :-))

graduation

geschter isch d graduation ceremony für ä james und dr luke gsi. ganz pompös im parliament house ufem parliament hügel ds canberra.


et voilà. zwar zumene andere zytpunkt mit der vivi, aber das isch es, ds parlamäntsgebäude.


pünktlech am halbi zwöi hetts agfange. wie ir chile hei mr alli müesse ufschtah und ir mitti si de d dozänte u fakultätsvorschteher inemarschiert. links mit dr blaue schärpe isch übrigens mini statistik dozäntin...


wo de alli vore platz gno hei, hei mier de o wieder dörfe absitze.


nach äre zum glück churze red vo dr frou chancellor hei de d fakultätsvorschteher ei name nach em andere abegläse u di entschprächende schtudis bzw. ex-schtudis hei ires diplom überreicht übercho u si düre saal zu irne plätz zrugg gloffe. das isch dütlech über ne schtund gange!!!


aschliessend hetts nomal äs paar redene gäh und ä chli musig u de hei de zersch di früsch diplomierte üse dörfe. denn hei mr wieder wie ir chile alli müesse ufschtah, bis di offizielle sech usebegäh hei u de hei de no ändlech mier dörfe abhusche.


vore ir blaue bluse, das isch übrigens d nana, em james sini grossmuetter.

chrischtboum made in australia

ir batten family isch es tradition, dass alli zäme dr chrischtboum ufschtelle und schmücke. normalerwys schteit er afangs dezämber, aber wül mr ändi novämber alli zäme uf melbourne si, hei mr erscht dises wuchenänd zyt gha. et voilà:


das isch ne, de chrischtboum :-)






bis itz isch es jedes jahr em len sis privileg gsi, dr boum zäme ds schtecke und alli andere hei ascht für ascht usenangfaltet u zuegreicht. aber diese jahr hett dr james dörfe...








mier hei öppe drü chischte voll chrischtboumdekoration a dä boum ghänkt! aber leider hani de vrgässe am schluss nomal äs föteli ds mache.... sorry :-)

mis erschte wärch

ändlech hanget er, em james si adväntskalender. gnäiht ha ne letscht samschtig u sunntig, aber ds ufhänke hett de chli lenger duuret...

action im brigalow court

geschter am abe hei mr richtig action gha im brigalow court. ä churzgschorne typ i shorts hett entweder ä wuetafall gha oder unbedingt gäld brucht. uf jede fall hett er alli schibene vor wöschchuchi mit äme bachschtei igschlage und drzue umegschroue. dr bachschtei hett er aschliessend uf ds garagedach gschosse. drufabe isch er richtig outos gloffe und o a üsem vrby. mier hei scho angscht gah, är machi wyter mit syre tour. aber är isch de ze de küdercontainer u hett die afa dürnüehle.

dr james hett dr polizei aglüte, wül äs zytli isch's würklech ziemlech gfürchig gsi. die hei de me als ä schtund brucht um ufztouche.... bis denn isch er natürlech scho über alli bärge vrschwunde gsi.

melbourne

letscht sunntig bis dise fritig symr ds melbourne gsi. ä geniali schtadt! mier hei gschoppet bis zur erschöpfig. vor allem chleider, schueh und schnickschnack.

dr alass für üse trip isch em luke, em james sim brüetsch, sini abschluss-usschtellig gsi. si hei iri industrial design abschlussprojekt am federation square, mitts im zentrum, usgschtellt. und natürlech ghoffet, dass o äs paar induschtrie-verträter uftouche und ne ä job abiete.

wül dr lee, dr anger brüetsch vom james, in melbourne läbt, hei das d'eltere grad zum alass gno, di ganzi familie wieder mal ds vereine. als erscht hie drum äs paar familie-föteli:


james, lee, candy, luke, len - vo links nach rächts ;-)


holly und lee






d'usschtellig isch wie gseit am fed square, imene ruum wo o durchgangszone isch, gsi. für d'eröffnig isch d usschtellig abghaget worde. mit security guards a de igäng! das isch aber nid vo de organisierende schtudis us cho, sondern hett müesse si, wül alkohol serviert worde isch. und um alkohol ds serviere, brucht me in ouschtralie ä liquor license. d liquor license gilt aber jewils nume für ä beschtimmte bereich, i däm fall innerhalb vo de abschrankige. u dr security typ isch derte gschtande, dass emu sicher nimer mit äme glas wy oder so dä bereich vrlaht. ds dumme isch gsi, dass äs paar vo de usschtelligsobjekt usserhalb vo de abschrankige gschtande si....

und zum abschluss no äs paar schopping shots:




üse lieblingslade: lost and found, smith street


ä vegane schuehlade.... :-)


und eifach zwöi schöni schoufänschter

äs isch überschtande!!!

ändlech! dä wahlk(r)ampf isch mr fang leid ufe geischt gange. wül si hie sozäge äs zwöi-parteie-syschtem hei, hei sech die beide parteie sit wuchene gägesitig ufe grind gäh. im radio, i de zytige, im fernseh, überall! egal, öb di einti partei öppis guets erreicht hett oder nid, wül's die anderi partei isch, cha's nüt rächts sy!

am meischte gnärvt hett mi d partei vom johnny, d'liberals. sit 1996 ar macht und vor allem druf bedacht, dass es är ökonomie guet geit. und zwyfellos, ar ouschtralische ökonomie geit's nid schlächt, aber dr durchschnittsouschtralier merkt leider nid vil drvo. d läbenschöschte (v.a. wohne u ässe) si brutal höch, d'sicherheit vo de arbeitnähmer, mieter etc. total tief. chündigungsfrischte bim schaffe sy 2 wuche max und bi wohnige 3 wuche. und d'umwält merkt o nüt drvo. global warming isch bis vor churzem vom johnny überhoupt nid wahrgno worde.

sit jedoch dr wahlkampf agfange hett, hett's vrschprächige graglet. so und so vil millione für d'umwält und gäge global warming. so und so vil millione für schuele. so und so vil gäld für kinderzuelage. gäge droge. usw. usw. mier si vo türe tv-spots und broschürene überschwemmt worde. aber natürlech immer ersch, wenn er realisiert hett, dass das d wahlkampthemene vor opposition, dr labour, si...

eine vo de närvigschte tv spots isch dä für's klima gsi. ä husfrou am wösch ufhänke seit: ke ahnig, wie solaralage funktioniere, aber d sunne zum wösch trochne bruche: i can do that! äs jungs päärli wächslet ä bire ire lampe us u seit: ke ahnig, wie schtrom produziert wird, aber schtromschparendi birene isetze: i can do that! und aschliessend hett ä vrtrouenswürdigi schtimm im hindergrund erwähnt, was dr schtaat für d umwält ds gedänke tuet und scho tuet. wär's gloubt!!

än andere ungloubleche tv spot hett sech um d sicherheit vom länd dräiht. äs git itz ä hotline. dert cha me choschtelos und anonym alüte, wenn eim öppis nid ganz koscher vorchunnt. we dr nachbar vilech chli ds lang vorem internet hocket, vilech ladt er ja än aleitig zum bombe baschtle abe? oder wenn er komische lüt ds bsuech überchunt, vilech plane si ja öppis illegals ...

zum glück sy de plötzlech alternativ-spots uftoucht. köschtlech! eine drvo sogar im fernseh. müesst er nech aluge!
anti - i can do that: video-link
anti - terror-angscht: video-link
anderi getup! kampagnene: video-link

geschter isch de zum glück alles ds änd gange. ouschtralie hett abgschtimmt und hett dr johnny dr bach abgschickt! yes!!

singer automatic 319k

letschthin hett's mr mal wieder dr nuggi usegjagt, wül die näihmaschine, woni im momänt cha bruche, chuum 10 cm am schtück cha näihe!! entweder vrjagts dr fade oder äs git äs gnusch uf dr untersite vom stoff oder dr motor hett nid gnue chraft, um dr fade düre schtoff ds zieh. am mäntig abe hani so gnueg gha, dass i äs gratis-inserat ir canberra times ha ufgäh:

wanted: sewing machine, $99, 0434 963 790

am zischtig isch es scho ir zitig cho und am nami hani scho ds erschte telefon übercho. bi ganz erschtunt gsi. ä nätti elteri lady hett mr aglüte, si heig ä singer ds vrchoufe. aber si hätti eigentlech no gärn $100.... (schtatt nume $99 :-)) mier hei de für am nächschte morge abgmacht, dass i die singer cha go aluege.

und i cha nume säge, ig ha wieder mal ä glücksträffer glandet. ä wahnsinnsmaschine! 40 jährig, i total guetem zueschtand (ire ma isch mechaniker gsi) und mit vollschtändigem zuebehör. äs büechli mit technische details, ä gebruchsawyisig, jenschti füessli und schpüeli und das isch dr hammer, mit äme lückelose set programm-jetons!!! i gloube die singer hett me schtich-variantene als mini nöi elektronische bernina deheime!! im büechli wärde über 8 sitene diversi schtichene vorgeschtellt.

itz muessi mr nume no ä näihplatz im büro irichte, dass i nid di ganz zyt dr ässtisch überschtelle. juhui!

durras

um dr schtart vo üsem uni-freie läbe gebührend ds fiire, sy mr äs paar tag as meer gfahre. vo canberra sys circa anderthalb schtund - mit üsem outo 2 schtund - bis as meer. mier hei äs chlyns hüsli ufeme härzige campingplatz buechet und hei eifach nume zyt gnosse und's gmüetlech gno. hei d känguruhs beobachtet, d papageie und änte gfuetteret, si go schpaziere, go bade und am schtrand liege... was me halt so macht :-))