monschter modäll

i gloube nid, dass a dere uni jemals öpper äs grössers modäll als dr james bout hett...

hhmm. also eigentlech isch es mis modäll.... i bi ds ameisli gsi, wo schtunde- und tagelang alli quervrschträbige zuegschnitte, igsetzt und aglimet und fasch alli bodekontur-schtäbli inegschteckt und aglimet hett :-))

radle mit em velo

wo mr züglet sy (zwüsche schtadtzentrum und uni), hei mr üs ändlech velos zuche tah. zwöi alti göpple us dr brocki. mier hei se nume müesse ufpumpe und scho sy sy parat gsi. ig ha's velofahre extrem vrmisst und frese itz wenn immer müglech mit em velo dür d'gägend. dr james muessi no überzüge.... zur uni u zum schtadtzentrum sys je öppe 5 km. zur uni dr hügu düruf (schnuf schnuf), zum zentrum liecht bärgab (juhui).
canberra isch anschiinend di velo-fründlechschti schtadt in ouschtralie. aber o hie isch velofahre no nid würklech sehr vrbreitet. s'isch meh ä schport als ä fortbewegigsart. und wül's so weni velofahrer hett, nickt me sech fründlech zue, we me eine chrüzt :-)
helmtrage isch obligatorisch. da muessi mi no dra gwane.

heizig und so

im email woni vor mire abreis vor uni ha übercho, isch gschtande, dass es in canberra cha chalt wärde - me söll also o warmi chleider mitnäh, pulli u so - dass aber d'rüüm guet gheizt syge. i ha das gar nid so richtig beachtet, wül i gwüsst ha, dass es cha chalt wärde und drvo bi usgange, dass hüser und wohnige gheizt wärde. ha! wär zu schön.
teil hüser hei heizige, aber si löh se nume uf schparflamme lah loufe um gas- oder schtromchöschte ds schpare und teil hüser hei überhoupt kei heizig. kei heizig! u das ire gägend wo's dütlech under null cha gah und mängisch o schneit (klima info). und ds tüpfli ufem i isch, dass d'hüser o chuum isoliert si.
üsi wohnig isch i somene hus. kei heizig und chuum isolation. drfür fänschter mit metallrähme wo nid richtig schliesse. womer mitti mei sy inezüglet, hei mr als erschts müesse go schtromfrässer-radiatore choufe, suesch wäri vrfrore. sithär hei mr zwöi grossi radiatore 7 x 24 schtunde lah loufe. aber würklech warm isch's nie worde. o schtrumpfhose, ugg-boots und alprausch-mantel hei mi nid immer chönne warm halte. und dr winter hett no nid mal richtig agfange....
mier hei de mal d'schtromchöschte hochgrächnet und sofort entschiede, dass mr ä gasofe müesse zuche tue. aber das isch eifacher entschide als tah. mier hei ke gas-aschluss und dr ofe ane gasfläsche a ds schliesse isch anschiinend illegal. also hei mr dr gasofe a eim ort, d'gasfläsche amene andere ort und d'verbindigsschtück zwüsche fläsche und ofe nomal amene andere ort müesse choufe. zersch symer gone fläsche choufe. di gröschtmöglichi variante isch ä 8.5 kg bbq fläsche (jööhh!). när hei mr dr ofe kouft. $650 di günschtigschti variante. u de symer uf d'suechi nach de vrbindigsschtück. dr erscht lade hett se üs nid wölle vrchoufe. dr zwöit lade hett se üs de vrchouft, aber ohni quittig...
uff. deheime hei mr de alles inschtalliert und igschalte. und scho geit dr füüralarm los! mannomann. itz hei mr's zwar chli wärmer, aber drfür durend underschwällig panik, dass öppis passiert.
drücket üs d'düme!

canberra

canberra isch ä komischi schtadt (touri-info). nid natürlech gwachse, sondern planet afangs letschts jahrhundert als än art utopia. mit viel wald, grüenflächeni (oder besser gseit 'brunflächeni'...) und schtrasse, um dür das paradies ds kurve. und alles isch ziemlech schtrikt izonet. schopping-zone, büro-zone, wohn-zone, induschtrie-zone etc.
di meischte lüt wohne imene hüsli i eim vo de quartier (suburbs). für ne ouschtralier isch es ds höchschte äs eigets hüsli uf äme eigete schtück land ds bsitze. lüt wo freiwillig miete - wie mier zum bischpil - wärde komisch agluegt.

priis schocks

d'schwyz isch ja bekannterwys äs hochpriisland und in ouschtralie isch alles vil günschtiger. denkste!!! canberra isch brutal tüür. hie äs paar bischpil ($1 = CHF1):

chnollesellerie: $4.98 pro stück (und das im woolworths mit low price guarantee...)
chefe: $ 14.98 pro kilo
banane: $ 5.97 pro kilo
äs 600 ml cola pet fläschli im supermarkt (nid öppe vom outomat): $ 2.80
ä liter milch: $ 1.90 bis 2.35
900 g nature joghurt: $ 3.69 (bim aldi...)

ph neutrali seifi: $ 14.98 pro schtück (göht im migros go luege wieviel derte a ph-balance seife choschtet...)

mieti für üsi 2 1/2 zimmer wohnig (ohni chüehlschrank, ohni heizig, schlächt isoliert,...): $ 260 pro wuche

gas-ofe: $ 350 ufwärts (mit em günschtigschte heizt me aber höchschtens ä 10m2 ruum)

kei ahnig wie sech vili ouschtralier finanziell dür's läbe wurschtle. d'löhn si nämlech für die meischte nid sehr höch (zämeschtellig vo durchschnittslöhn, s. 29ff). dr durchschnittlohn vore ernährigsberaterin isch zum bischpil 60% vo däm woni ir schwyz vrdient hat. und isch sogar 10% tiefer als mi lohn, woni vor 10 jahr übercho ha, woni ha afa schaffe...

schtudänteläbe.....

üse tempel des wissens heisst university of canberra (www.canberra.edu.au). dr james kämpft sech dür sis letschte jahr architektur und i bi i master of nutrition itoucht.

ds erschte semeschter isch überschtande. uff!! s'isch ziemlech hert gsi, nach so vilne jahr wieder ä schuelbank ds drücke, aber langsam hani dr dräih wieder dusse.

pro semeschter muessi 4 fächer absolviere. pro fach hei mr 4 bis 5 schtunde unterricht und offiziell 5 bis 6 schtunde sälbschtstudium plus x schtunde um arbeite ds schriebe. 1 bis 2 fächer si obligatorisch, die andere chani sälber uswähle.

semeschter 1: epidemiology & principles of research // health & nutrition across the lifecycle // influencing change: policy, food & community // contemporary health development

semeschter 2: statistics // nutrition, health & society // food & consumer science // program planning & evaluation

semeschter 3: biochemistry // marketing // research project // ..

semeschter 4: biochemistry // consumer behaviour // research project // ...