ohne worte...

father's day

a propos glychberächtigung und so. nächscht sunntig, am 2. septämber, isch de übrigens vatertag!! emu in ouschtralie.... bunnings, än art do-it-lade hie, git sogar ä schpezielle vatertags-katalog use :-) überzüget nech sälber: bunnings

the wizard of oz

ungloublich, aber i ha dä klassiker hüt würklech ds erschte mal gseh! und sogar im chino! d'vorschtellig isch usvrchouft gsi. zu drü viertel mit chinder :-) und mier hei ir drittvorderschte reihe ganz usse müesse sitze. aber s'hett sech glohnt.
vor churzem isch ds canberra äs nöis chino ufgange. ds arc im 'national film & sound archive'. ändlech än ort wo absolut ke hollywood schrott zeigt wird. juhui! s hett hie nid vil chinos u di meischte zeige leider nume mainstream. eis einzigs anders chino bringt o ab und zue än independent movie wie zb 'das leben der anderen'. i hoffe nume, ds arc überläbt. das isch nämlech nid dr erscht vrsuech für nes indepenent chino in canberra. ig ha vo zwöine andere ghört, wo beidi sy igange. i wirde's emu tatchräftig underschtütze und regelmässig go ne film luege.

mini petite

im fach 'food & consumer science' heimer 3 schtund labor pro wuche. laborchittel obligatorisch. schtatt immer äs alts trainerjäggli vom james ds bruche, hani chürzlech än eigete chittel kouft. di vrfüegbare grössine sy gsi: petite (tönt schnüsig, oder?) - small - medium - large - xl - xxl - xxxl - xxxxl (!!!).
zersch hani äs large probiert - ds gross. de bini zum medium übergange -usvrchouft. hmm, de halt small. u no das isch ä chli ds gross gsi, aber ok. deheime hani de ds volle grössi-schpektrum uf dr vrpackig entdeckt.... mini petite, extra petite, petite, small, medium, large, xl, xxl, xxxl, xxxxl, xxxxxl, xxxxxxl, xxxxxxxl! 7xl!!!

hüt ufem heiwäg

we's pressiert oder dunkel isch, fahri uf dr houptschtrass zur uni u hei. häre - dr schtutz deruf - hani um die 20-25 minute, hei - dr schtutz derab - um di 15 minute. i letschter zyt hani zwar albe lenger, wül's windet wie gschtört! chume mr albe vor wie imene windkanal...

we'ni gnue zyt ha, nimi dr velowäg. das geit lenger, aber s'isch drfür schpannender. hüt bim heifahre bini zum bischpiu are gruppe neugirige känguruh und jenschte papageie begägnet.