melbourne

letscht sunntig bis dise fritig symr ds melbourne gsi. ä geniali schtadt! mier hei gschoppet bis zur erschöpfig. vor allem chleider, schueh und schnickschnack.

dr alass für üse trip isch em luke, em james sim brüetsch, sini abschluss-usschtellig gsi. si hei iri industrial design abschlussprojekt am federation square, mitts im zentrum, usgschtellt. und natürlech ghoffet, dass o äs paar induschtrie-verträter uftouche und ne ä job abiete.

wül dr lee, dr anger brüetsch vom james, in melbourne läbt, hei das d'eltere grad zum alass gno, di ganzi familie wieder mal ds vereine. als erscht hie drum äs paar familie-föteli:


james, lee, candy, luke, len - vo links nach rächts ;-)


holly und lee






d'usschtellig isch wie gseit am fed square, imene ruum wo o durchgangszone isch, gsi. für d'eröffnig isch d usschtellig abghaget worde. mit security guards a de igäng! das isch aber nid vo de organisierende schtudis us cho, sondern hett müesse si, wül alkohol serviert worde isch. und um alkohol ds serviere, brucht me in ouschtralie ä liquor license. d liquor license gilt aber jewils nume für ä beschtimmte bereich, i däm fall innerhalb vo de abschrankige. u dr security typ isch derte gschtande, dass emu sicher nimer mit äme glas wy oder so dä bereich vrlaht. ds dumme isch gsi, dass äs paar vo de usschtelligsobjekt usserhalb vo de abschrankige gschtande si....

und zum abschluss no äs paar schopping shots:




üse lieblingslade: lost and found, smith street


ä vegane schuehlade.... :-)


und eifach zwöi schöni schoufänschter

äs isch überschtande!!!

ändlech! dä wahlk(r)ampf isch mr fang leid ufe geischt gange. wül si hie sozäge äs zwöi-parteie-syschtem hei, hei sech die beide parteie sit wuchene gägesitig ufe grind gäh. im radio, i de zytige, im fernseh, überall! egal, öb di einti partei öppis guets erreicht hett oder nid, wül's die anderi partei isch, cha's nüt rächts sy!

am meischte gnärvt hett mi d partei vom johnny, d'liberals. sit 1996 ar macht und vor allem druf bedacht, dass es är ökonomie guet geit. und zwyfellos, ar ouschtralische ökonomie geit's nid schlächt, aber dr durchschnittsouschtralier merkt leider nid vil drvo. d läbenschöschte (v.a. wohne u ässe) si brutal höch, d'sicherheit vo de arbeitnähmer, mieter etc. total tief. chündigungsfrischte bim schaffe sy 2 wuche max und bi wohnige 3 wuche. und d'umwält merkt o nüt drvo. global warming isch bis vor churzem vom johnny überhoupt nid wahrgno worde.

sit jedoch dr wahlkampf agfange hett, hett's vrschprächige graglet. so und so vil millione für d'umwält und gäge global warming. so und so vil millione für schuele. so und so vil gäld für kinderzuelage. gäge droge. usw. usw. mier si vo türe tv-spots und broschürene überschwemmt worde. aber natürlech immer ersch, wenn er realisiert hett, dass das d wahlkampthemene vor opposition, dr labour, si...

eine vo de närvigschte tv spots isch dä für's klima gsi. ä husfrou am wösch ufhänke seit: ke ahnig, wie solaralage funktioniere, aber d sunne zum wösch trochne bruche: i can do that! äs jungs päärli wächslet ä bire ire lampe us u seit: ke ahnig, wie schtrom produziert wird, aber schtromschparendi birene isetze: i can do that! und aschliessend hett ä vrtrouenswürdigi schtimm im hindergrund erwähnt, was dr schtaat für d umwält ds gedänke tuet und scho tuet. wär's gloubt!!

än andere ungloubleche tv spot hett sech um d sicherheit vom länd dräiht. äs git itz ä hotline. dert cha me choschtelos und anonym alüte, wenn eim öppis nid ganz koscher vorchunnt. we dr nachbar vilech chli ds lang vorem internet hocket, vilech ladt er ja än aleitig zum bombe baschtle abe? oder wenn er komische lüt ds bsuech überchunt, vilech plane si ja öppis illegals ...

zum glück sy de plötzlech alternativ-spots uftoucht. köschtlech! eine drvo sogar im fernseh. müesst er nech aluge!
anti - i can do that: video-link
anti - terror-angscht: video-link
anderi getup! kampagnene: video-link

geschter isch de zum glück alles ds änd gange. ouschtralie hett abgschtimmt und hett dr johnny dr bach abgschickt! yes!!

singer automatic 319k

letschthin hett's mr mal wieder dr nuggi usegjagt, wül die näihmaschine, woni im momänt cha bruche, chuum 10 cm am schtück cha näihe!! entweder vrjagts dr fade oder äs git äs gnusch uf dr untersite vom stoff oder dr motor hett nid gnue chraft, um dr fade düre schtoff ds zieh. am mäntig abe hani so gnueg gha, dass i äs gratis-inserat ir canberra times ha ufgäh:

wanted: sewing machine, $99, 0434 963 790

am zischtig isch es scho ir zitig cho und am nami hani scho ds erschte telefon übercho. bi ganz erschtunt gsi. ä nätti elteri lady hett mr aglüte, si heig ä singer ds vrchoufe. aber si hätti eigentlech no gärn $100.... (schtatt nume $99 :-)) mier hei de für am nächschte morge abgmacht, dass i die singer cha go aluege.

und i cha nume säge, ig ha wieder mal ä glücksträffer glandet. ä wahnsinnsmaschine! 40 jährig, i total guetem zueschtand (ire ma isch mechaniker gsi) und mit vollschtändigem zuebehör. äs büechli mit technische details, ä gebruchsawyisig, jenschti füessli und schpüeli und das isch dr hammer, mit äme lückelose set programm-jetons!!! i gloube die singer hett me schtich-variantene als mini nöi elektronische bernina deheime!! im büechli wärde über 8 sitene diversi schtichene vorgeschtellt.

itz muessi mr nume no ä näihplatz im büro irichte, dass i nid di ganz zyt dr ässtisch überschtelle. juhui!

durras

um dr schtart vo üsem uni-freie läbe gebührend ds fiire, sy mr äs paar tag as meer gfahre. vo canberra sys circa anderthalb schtund - mit üsem outo 2 schtund - bis as meer. mier hei äs chlyns hüsli ufeme härzige campingplatz buechet und hei eifach nume zyt gnosse und's gmüetlech gno. hei d känguruhs beobachtet, d papageie und änte gfuetteret, si go schpaziere, go bade und am schtrand liege... was me halt so macht :-))

partytime

it's partytime! dr james hett sini abschlusspräsi gha u beschtande!!! gratulations-sms bitte a folgendi nummere: +61 423 158 305 :-))

geschter am abe isch de gfiiret worde, mit usschtellig, priisvrleihige, redene, vil flüssigem und wenig feschtem....













gändet hett's de chli weniger schön... ig ha bim gah dr falsch schlüssel ipackt und mier si de schtatt im bett vor vrschlossene türe gändet. einzigi rettig: locksmith. hett äs zytli duuret bis är ändlech cho isch, aber ds uftue isch de erschreckend schnäll gange. zwe sekunde oder so. poahhh!

halbzyt u fertig

juhui, äs isch überschtande! für mi isch halbzyt u dr james isch ändlech fertig mit schtudiere. itz faht äs neus läbe a :-))

finger weg!!

nei, das isch nid äs sushi. das isch äs schtück vo mim zeigfinger! zum glück vom lingge. morn hani nämlich 6 schtund schriftlechi prüefige.

und nei, s'isch nid bim choche passiert, sondern bim modäll boue. dr james muess morn sis abschlussprojekt präsentiere und i bi di paar letschte tage am hälfe gsi, dass alles rächtzytig fertig wird. das sushi hani mit äme teppichmässer ds schtand bracht. bi am karton schnide gsi. dicke karton. und schwupps....

weh tuets zum glück nid würklech und i hoffe, äs blibt äso!!

prüefigsschtress

hüt hani di erschti prüefig gha. food & consumer science. total interessants fach. vor äs paar wuche isch ä vorläufige prüefigsterminplan usecho u die prüefig isch uf nächscht wuche agseit worde. äs paar wuche schpeter isch de dr definitiv plan usecho u die prüefig isch uf hüt vorvrschobe worde. donnschtig, 14h bis 17h. alles kes problem. ig ha di letschte paar täg flissig glehrt, bi geschter zitig is bett, hüt rächtzytig ufgschtande. alles paletti. gäge di 10i lütet mis handy, woni langsam ha anes zmorge dänkt. d vicki deakin, dozäntin u abteiligsleitere vom bereich ernährig. hi esther. how are you? - i'm good thanks, how are you? - eeeh, you know, you've got an exam this morning.... - WHAT!?!?! läck, isch das ä schock gsi. anschiinend isch dr definitiv prüefigsplan doch nid so definitiv gsi u si hei ne nomal gändert. d prüefig isch ufe morge vorvrschobe worde. aber mier si nid informiert worde. si hei eifach agnoh, dass alli wohl regelmässig dr prüefigsplan konsultiere.... tja, i nid. d vicki hett mi de aber grad beruhiget. i bi zum glück nid di einzigi gsi. d tanya hetts o nid mit übercho u isch no drheime gsi. mier si de beidi uf di halbi elfi ad uni u hei d prüefig imene separate ruum chönne schriebe. läck, zum glück geit d vicki immer go kontrolliere, öb all iri schtudänte ad prüefig aträte. das macht süsch ke angere dozänt. und zum glück bini nid di einzigi gsi. wär süsch no viiiil pinlecher gsi!! für d prüefige wo nächscht wuche aschtöh, wirde itz wohl jede tag dr prüefigsplan abelade. me weiss ja nie... :-))