bier spots

bi grad chli ufem tv-spot-trip... di beschte spots im ouschtralische färnseh si eidütig die für bier. wörum äch?! :-))

mini favorite-serie (unbedingt zersch 'harvest' luege, när schpilt d reihefolg ke rolle me):toohey's extra dry harvest

toohey's extra dry hairy
toohey's extra dry sunburnt
toohey's extra dry glow
toohey's extra dry mini
toohey's extra dry crispy

und wyteri trohn-awärter:
toohey's extra dry tongue
carlton draught flashbeer
carlton draught big ad
vb orchestra

national security hotline

d national security hotline chönnt än erfindig vo dr svp si! jedes mal weni dä tv spot gseh, git's mr fasch eine. klicket ufe link 'national security hotline' u überzüget nech sälber...

3. semeschter überschtande

hüt hani di letschti prüefig vom 3. semeschter gha und drmit ds 3. semeschter abgschlosse. ändi juli faht de ds 4. u letschte semeschter a.

d prüefig hüt hett ar catholic university schtattgfunde. s'isch für d färnvorläsig ar deakin university vo melbourne gsi: trends and innovation in food science. s'isch alles chli reläxter als ar university of canberra abgloffe. nume 9 lütli vo 7 vrschiedne vorläsige. dr dixer, woni mitgnoh ha, isch nid uf notize u vrschteckti zedeli dürsuecht worde, d täschene hei mr dörfe bi üs bhalte und vore hetts ä tisch mit wasser u bächerli zur sälbschtbedienig gha (so härzig). dr 'kontrolleur' hett nis äs paar mal sogar älei gla und isch usem ruum vrschwunde. :-)

itz also no eis semeschter u de hani's gschafft. än übergordneti abschlussprüefig git's nid. jedi vorläsig wird für sich sälber abgschlosse, mängisch mit prüefig, mängisch mit äre durchschnittnote vo de diverse semeschterarbeite. macht alles chli eifacher :-)

vo three zu iinet

juhui, mier hei üses internet ufgmotzet!

womer vor guet äme jahr i üsi wohnig sy züglet, hei mr üs für nes 'broadband wireless' internet vo three entschide. mier hei ä sim-charte übercho, wo mr ines chliins grätli hei gschteckt und via usb mit em compi vrbunde hei. so hei mr ke telefonaschluss bir telstra (dr ouschtralische swisscom) müesse miete. u internet über kabel git's hie leider nid.

mier hei $49 pro monet für 1 gb (!!!!) up/download plus $10 fürs grätli zahlt. 1 gb isch nüt!! das si 30 mb pro tag... aber s'isch ds beschte u günschtigschte agebot gsi. nach öppe zwöi mönet hei mr äs schribe übercho, dass si iri agebot überarbeitet heige und mier itz 2 gb pro monet überchäme. wow...! nach äs paar witere mönet hei si iri agebot wieder überarbeitet: 4 gb pro monet. aber mier si uf 2gb blibe. für 4 gb hätte mier ä neue vrtrag müesse underzeichne, üs wieder für 12 mönet vrpflichte u no umschaltgebühre (!) müesse zahle. wo de üsi 12 mönet am usloufe gsi sy, sy d agebot bi 6 gb pro monet für $49 aglangt. ig ha de aglüte u gfragt, was passieri, we üse vrtrag usloufi. öb mier outomatisch us 6 gb umgschalte wärde? aber nei! üse vrtrag loufi uf 2 gb wyter, da syg nüt ds mache. ig ha's fasch nid gloubt!

da hei mr afa umeluege, was underdesse süsch no so abote wird u hei 'naked dsl' vo iinet gfunde: 30 gb für $69 pro monet. u we mr me als 30 gb bruche, wird d vrbindig eifach langsamer, ohni dass mr wie vorher 10 ct pro zuesätzlechs mb müesse zahle. isch über d telefon-linie, aber me brucht ke aktive telefonaschluss. perfekt! itz hei mr ä wireless-router u chöi sogar beidi glychzitig surfe. vorhär hett immer nume öpper vo üs chönne online sy, dä mit äm sim-charte-grätli.

d höchi isch ja no gsi, womer de äs paar tag schpeter wieder bi three aglüte hei, um üs abzmälde, hei si nes plötzlech wölle bhalte. hei nes 6 gb, ohni vrtragsvrpflichtig und ohni $10 mieti fürs grätli wölle abiete. tja, ds schpät!

und übrigens, sit mr ds neue internet hei, bini wieder besser via skype erreichbar, ohni dass me öppis konkrets mit mier muess abmache!

isolation à l'australienne

13°c: das isch d durchschnittstemperatur i üser wohnig im momänt. und dr winter hett no nid mal richtig agfange.....

dass d wohnig ke heizig hett, wüsster sicher alli scho. aber zuesätzlech beschtöh d mure nume us zwöi reihe bachschtei ohni irgendwelchi isolation und d fänschter si ä metallrahme mit äre glasschibe dinne. ds problem mit dä fänschter isch, dass si kei doppelverglasig hei, dass dr metallrahme alli chälti ineleitet, dass es zwüsche metall u glas inezieht u dass me d fänschter nid richtig schliesse cha. unne gseht dr eine vo dene öppe 2 cm grosse schpält...



u das isch üsi morgendlichi ussicht: agloffni fänschter


üsi wohnig isch nid öppe än usnahm! di meischte ouschtralier hei drum mega-dicki-doppellagigi vorhäng, wo bis a bode abe göh u so d chelti chli dussebhalte. aber si bhalte o ds liecht dusse und me chunnt sech chli wie läbändig begrabe vor. frage mi albe, wörum si überhoupt fänschter ines huus boue. im summer si d vorhäng zue, um d hitz dusse ds bhalte und im winter wäg dr chelti.....

i chönnt nid tag-i-tag-us ohni sunneliecht si, drum hei mr im büro kener vorhäng. drfür louft äs elektroöfeli uf hochture!



im wohnzimmer hingäge hei mr ä vorhang-isolation inschtalliert. üsi isolation beschteit unsere schicht lamälle und zwöi schichte doppellagigem vorhang. dr inner vorhang hei mr ufs fänschterbrätt gschtopft, dass di chalti luft vom fänschter nid diräkt a bode abesinkt. und i gloube, äs hilft würklech. mi dünkt, äs syg chli weniger chalt als letschts jahr, woni mi no gweigeret ha, d fänschter 24 schtund lang mit vorhäng ds verbarrikadiere. nume ds lüfte isch itz chli äs problem.... :-))

häxeschuss

am sunntig abe isch dr james vom sässel ufgschtande und irgend öppis isch nem i rügge gschosse. mier heis mit voltaren igsalbelet und si is bett gange. isch ziemlech ä schlimmi nacht gsi, mit vil ume-rannge und ume-schtöhne. am mäntig morge isch er de ufgschtande, zum wc ghumplet ..... und zämebroche.

är isch am bode gläge und hett nume no gschroue. ig ha o fasch afa panicke u d nachbare hei äuä gmeint, i syg ne am abschlachte. ig ha de ar ambulanz aglüte u die si zum glück scho i wenige minute da gsi. nach äs paar ampullene morphium hett er de chönne ufschtah und zur liegi humple. ds luschtige isch gsi, dass beidi paramedics frouene gsi si und är nackt am bode gläge isch. :-)

mier si de mit dr ambulanz is schpital gfahre und är isch derte wyter mit schmärzmittel vollpumpet worde. si hei ne de gröngget (hett zum glück nüt gseit) und nem bluet gnoh, um irgendwelchi entzündigsparameter ds mässe (uf die resultat si mr no am warte).



nachdäm si nem ä transfusion vo 2 liter salzwasser hei ineglah und ne mit schmärzmittel, entzündigshemmer und chrampflöser vollpumpet hei, hei si üs de wülle heischicke. aber scho nach 5 meter loufe isch er wieder zämebroche. är isch de vor notfall-abteilig id clinical diagnostic unit vrleit worde.



derte isch em schtrickti bettrueh vrordnet worde und är hett dr räscht vom tag und o d nacht derte vrbracht. am zischtig morge isch de ä physiotherapeutin cho, hett em äs paar üebige zeigt und ne definitiv heigschickt.

sithär liit er deheime, macht syni üebige, schteit ab und zue uf u louft ume wiene banane (total chrumm). aber langsam chunnts wieder.

bawley point

letschts wuchenänd simer vom anes geburifeschtli iglade gsi: dr tao (rächts) und d seda (links) si 2 worde.



si si kiddies vom al, ämene fründ vom james, wones feriehüsli in bawley point, dunne ar küschte hett. bawley point isch öppe 3 schtund vo canberra entfernt. aber d fahrt lohnt sech. s füehlt sech a wie ferie. leider isch s wätter nid wahnsinnig gsi, aber drfür hett's no weniger lüt als süsch gha.











das isch nid äs ufo-föteli, sondern dr gröscht roche woni jemals ha gseh dürs wasser schwäbe. schpeter hei mr de o no äs jungs gha. när hei mr de vrnoh, dass i däm egge ä ganzi roche-familie wohnt.



di weniger erboulechi site vo üserem trip si di tote tierli am schtrasserand gsi. känguruhs, füchs und extrem vil wombats. und wül si eifach ligge gla wärde, gseht me se i allne schtadie, vo früsch überfahre über halb verwest zu vrtrochnete fällfätzene. ds rote chrüz bedütet, dass si checket worde si. falls äs wybli trächtig wär gsi, würde si ds junge vrsueche ds rette.

electrical blanket

bevor i da häre bi cho, hani gar nid gwüsst, dass es das git und itz hei mr o eis. äs heiz-fixliintuech. $29.99 für äs queen-size electrical blanket. äs aldi-schnäppchen :-)

das wird itz üsi zwöi bis drü bettfläschene ersetze und üs hoffentlich di ganzi nacht warm bhalte.