powerizer

(c) www.poweriser.com.ar

dr james hett ä neue schpliin! powerizers....! und das mit sim chnöi und rügge. aber är isch nid drvo abzbringe. i gseh mi scho wieder näbeme schpitalbett sitze....

zum glück haltet ne üses budget im momänt no zrugg. är muess zersch si alt ämp vrchoufe. und i gloube, das wird äs zytli dure :-)

wiifit

juhui, s isch ändlech cho! drü wuche lang hei mr müesse warte u zwüschedinne hei mr no d quittig vrnuschet.... aber die isch zum glück wieder fürecho u geschter hani ds wiifit im gschäft chönne go abhole.

itz isch alles inschtalliert u hüt am morge hani scho mini erschti trainingssession gha :-) jogge zum ufwärme, de yoga, diversi muskelüebige und vrschiedeni balanceäkt. äs fägt!!

ischribe-chrampf

am mäntig faht ds letschte semeschter a. 15 wuche, de prüefige und ig ha's gschafft.

wül d uni of canberra (uc) ziemlech chliin isch und ig halt o scho än ernährigsusbildig u 10 jahr brueferfahrig hinder mier ha, isch's mit dr zyt immer schwieriger worde, 4 vorläsige pro semeschter uszwähle. drbi müesses nid ämau nume vorläsige us dr ernährig oder vrwandte bereiche si. i dörft mi i jeglichi vorläsige ischribe, solang si für postgraduate schtudänte (dh wo scho a bachelor-abschluss hei) si. landschaftsplanig, rächt, architektur, physiotherapie, japanisch, ....
aber eifach irgend öppis ds schtudiere, dass i när mis papier überchume, mani o nid. im letschte semeschter hani drum 'consumer behaviour' mit de marketing-lüt und 'ethical and professional issues' mit de 'community developers' gwählt. und ig ha än usnahmebewillligung übercho, dass i 'trends and innovation in food science' ar deakin uni in melbourne cha mache. internationali schtudänte dörfe sech anschiinend normalerwys nid 'cross-institutional' ischriebe.

für dises semeschter isch's no schlimmer worde. i bi d vorläsigslischte vor uc x-mal düre gange, ha aber eifach würklech nüt gfunde! dises mal hani drum 2 färnvorläsige ar deakin ('food, nutrition and behaviour' u 'food product and nutrition innovation') und 1 face-to-face vorläsig ar australian national university (anu) mit de anthropologe ('food for thought'). und als vierti vorläsig gilt mis eigete projekt, woni aber no ufgleise muess.

zum glück si si in ouschtralie so reläxt mit em biege vo regelige!

usser ar anu.....! isch ja schliesslech d elite uni vo ouschtralie.... ig ha fasch vögel übercho. uf uc-site hett alles wunderbar klappet. ig ha alli underschrifte problemlos u super-schnäll übercho. aber mit der anu hani när würklech ziemlech ä chrampf gha....

mo, 7.7.
ok und underschrift vor usnahmebewilligung dür d jane. leider isch mi termin bi ire churz vor de 5i gsi und ds administration office, wo o no muess underschriebe, hett när scho zue gha.

di, 8.7.
bim usfülle vo de anu-formular findi de use, dass i dr amäldetermin verpasst ha. wär am 30.6. gsi... ok, das isch mi fähler.
telefon zum administrations office vor anu. nei, sorry, ds schpät isch ds schpät. das hani natürlech nid chönne gloube, mit allem was i bis jetzt in ouschtralie erläbt ha. i lüte drum diräkt ad schuel a, wo die vorläsig abietet. ja, sött kes problem si, aber mier kläres no ab u lüte zrugg. und i warte u warte u warte. gäg di 5i lüti de wieder a, wül i nid nomau ä tag wott vrpasse. sorry, si völlig im schuss. aber s'isch ok, hei's mit dr fakultät abklärt. d'sue hett mr de erklärt, dass i d amäldig übere normal wäg bim admin office ireiche söll, aber glychzytig o no ad vanessa vor fakultät faxe söll. doppelt gnäiht häbi besser. juhui!

mi, 9.7.
zum uc administration office, liason officer u nomal zur jane für wyteri underschrifte. d jane isch aber dr ganz tag uswärts am schaffe gsi. zum glück hani de än anderi dozäntin gfunde, wo churzerhand für d jane underschriebe hett.
fax ad vanessa.
anu administration office. dert seit mr si am schalter, dass mini amäldig ev. nümme bearbeitet wärde, wül i ds schpät bi. woni de di ganz gschicht mit sue und vanessa erkläre, seit si ok u chläbt äs post-it uf mini amäldig.

do, 10.7.
funkschtilli

fr, 11.7.
email as anu admin office, öb alles ok sigi. ke antwort.

12./13.7.
wuchenänd

mo, 14.7.
telefon as admin office. si cha mini amäldig nid finde, lüti mr zrugg. warte, warte, warte....

di, 15.7.
telefon as admin office. si cha mini amäldig nid finde, lüti mr zrugg. warte, warte, warte... dises mal lüti aber gäge di 4i nomal a. mini amäldig syg vrlore gange!! öb i se nomal chönn ireiche?
i düse drum mit em velo zur anu und reiche alles nomal i. sicherheitshalber machi o no äs email ad sue und vanessa und erkläre mi situation.

mi, 16.7.
gäge abe chumi äs email vor vanessa über, si heigi grad mini amäldig abgsägnet. i sött gäge ds ändi vor wuche offiziell vom admin office bscheid übercho.

do, 17.7.
warte uf bscheid

do, 18.7.
warte uf bscheid

19./20.7
wuchenänd

mo, 21.7.
d uni faht a....

so, das isch se. d churzfassig vor mire ischriebe odyssee. dass si no all mini diplom u zügnis us dr schwzy hei völle gseh u so, bevor si chönne entscheide.... drvo vrschoni nech itze.

the meatrix

für alli fleischässer under öich :-))
the meatrix

(und hie no mit untertitle)

send a whale

machet o mit bi dere greenpeace petition u schicket öie eigene origami wal zum japanische premier minischter!!!

http://www.send-a-whale.com

cello

im gägesatz zum james han ig chönne warte, bis es sowit isch gsi... :-)

scho ewig lang hett er drvo gredt, dass er möcht lerne cello schpile. aber wiener so isch, i tate umgsetzt hett er's nie.

ig ha'nem drum cello unterricht organisiert u bi go nes cello miete. sini erschti lektion hett er i zwöi wuche. und bis denn muessi itz äuä regelmässig cello gequitsche ertrage. chuum hett er nämlech ds cello gseh, hett er scho afa schpile. zum glück hani bis nachem dusche gwartet mit dr bescherig. süsch wär er no unduscht go schaffe. so hett er itz wenigschtens nume ds zmorge und sini rügge-üebige 'vrschpilt', bevor er is büro hett müesse.

world youth day

scho gli isch's sowit: world youth day in sydney! zum glück wohne mr nid ds sydney....

wül dr papscht o drbi wird si, isch d polizei d sicherheitsvorcherige anschiinend scho sit monate oder no lenger am plane. dr letscht coup isch itz ä gsetzesänderig gsi. d polizei darf nid nume persone, wones sicherheitsrisiko darschtelle, vrhafte oder dürsueche, sondern o lüt wo pilger närve....... und das si eigentlech alli, wo gäge papscht demonschtriere. sogar pariser vrteile isch närvend und schtörend. die schpinne!!!

zum glück git's ziemlech widerschtand gäge die zuesätzleche polizei-rächt und ä gruppe wott's sogar vor gricht bringe, wül si finge, das ganze syg vrfassigswidrig.

geschter hett d no-to-pope gruppe zure närvende modeschow ufgrüefe :-)


(c) ABC news

und si hei t-shirt mit diverse slogans produziert: 'pope is wrong, use a condom', 'pope go homo', 'this shirt is annoying', ....

wii

dr james hett mr äs wii fit gschänkt!!

ds wii (oder dr wii..?) isch inschtalliert, ufs wii fit muess i leider no chli warte. s'isch usvrchouft. eigentlech hätt's äs gschänk für üse 2. hochzytstag sölle sy, aber woner's am samschtig isch go choufe, hett er nid chönne warte.... :-)



mier hei üs gägesitig äs mii kreiert - erkennet er üs? mis heisst ii , em james sys jii - und afa schpile und natürlech hani grad vo afang a immer ufs dach übercho. hett mr d freud am ganze grad chli vrdorbe... i hasse ds vrliere! aber i warte itz ufs wii fit u de fangi afa trainiere! :-))

gsalzni rächnig

am james si rügge isch sech langsam wieder am erhole. nachdäm är vom schpital isch hei cho, isch er dr räscht vor wuche deheime blibe, zersch meischtens flach u gäges ändi immer meh vorem computer. das isch de dr momänt gsi, wo mi dünkt hett, är chönnt wieder go schaffe.... :-)

underdesse si fasch drü wuche vrgange, aber är gschpürts immer no chli und si rügge isch immer no äs bitzli chrumm. hätt ehrlech gseit nie dänkt, dass das ganze so lang geit. zum glück fahrt er itz aber sit äs paar tag wieder mit em velo zum schaffe u brucht mini chauffeuse-dienschte nümme.

vorgeschter hett's nomal äs chlyns nachbebe gäh. mier hei d rächnig vor ambulanz übercho.... $696! ds beschte dranne isch, medicare, das isch di schtaatlichi grundvrsicherig, deckt ambulanz transporte grundsätzlech nid ab. itz wüsse mr emu, für was mr em james sini lohnerhöhig chöi isetze.... :-)

winterschpaziergang

letschthin bini chli go loufe. ha im momänt ja chli meh zyt also süsch :-) d uni faht ersch wieder am 21. juli a. ds letschte semschter!

ganz ir nächi vo womer wohne hetts ä wald. s'sich u ne schöne tag gsi, blaue himmel u so. hie äs paar föteli...

obwohls in canberra dütlech 4 jahreszyte git (früehlig u herbscht gfalle mr hie am beschte), hett's hie o pflanze, wo im winter blüie u vil böim si immergrüen.





o in canberra brönnts immer wieder ab und zue. dr letscht gross waldbrand isch aber zum glück äs paar jahr här. dä boum hie hett sech eifach dr vrchohlte rinde entledigt u wachst munter wyter.



und dä gseht vor einte site ganz normal us....



... und vor angere site so! s gseht us, als hätti nume d rinde ds füür überschtande, aber är läbt immer no u hett bletter u wachst....