batterie entsorge....?!

hüt simer vo shop zu shop u hei üsi bruchte batterie wölle zrugg gäh. aber überall hei si gseit, sorry, nei, mier näme ke batterie zrugg. aber vrchoufe tüe si se überall...

vore bini de ufs internet, um d adrässe vore entsorgigsschtell ds finde. das hani de uf dr website vom 'department of territory and municipal services' gfunde:

Batteries (household) - There is no current collection system for household batteries. Battery World in Phillip will accept small quantities of household batteries for recycling at no cost. For larger quantities, costs apply. Contact them on 13 17 60. Otherwise, household batteries can be disposed of in your household waste bin.

was heisst äch 'small quantities'? mier hei äs chlyns säckli voll... und überhoupt, phillip isch nid grad ume egge, gäge ne halbschtündigi outofahrt vo üs deheime! vilech näme mr se de zrugg id schwyz und entsorge si de derte :-)))

fondue

letscht samschtig hei mr äs fondue gha!!

üsi fondue-mischig hei mr sälber müesse zämeschtelle, wül ds einzige fondue, wome hie cha choufe, isch äs gerber fertig-fondue. iiiiiih.

guete chääs ds finde, isch hie aber nid allzu eifach. u schwyzer chäs no vil schwieriger. im lädeli vis-à-vis hei si zum bischpil gruyère. $50 pro kg! und bi mother's nature - än art "deli" lade mit euro-food - hei si dütsche ämmetaler.... oohooo!



deli miz afüehrigszeiche, wül alles wo vo europa chunnt, also o äs gärber fondue oder än ikea-holunder-sirup, gilt outomatisch als delikatesse... :-))

üses fondue heimer de schliesslich mit äre mischig us schwyzer gruyère, dütschem ämmetaler, dütschem kirsch, ouschtralischem chnoblouch, mähl u wysswi zouberet. mmhhh!

lampige salat

chürzlech hani entdeckt, dass sogar salat hie äs vrfalldatum hett und zwar äs mindeschthaltbarkeitsdatum wie anderi haltbari nahrigsmittel wie zb uht-milch. itz weissi, wörum me hie chuum früsche, knackige salat findt.

dä salat hani zb am 11. ouguscht kouft und scho denn isch er nümm früsch gsi, sondern scho chli gummig zum alänge. und sini gschpänli si no bis zum 15.8. vrchouft worde! uiuiui...

kumamoto artpolis

im momänt hei si ar uni ä usschtellig über japanischi architektur: kumamoto artpolis. vo de usgschtellte 73 projekt si sage u schreibe 7 öffentlechi toilettene :-))))















und hie no ds ultimative holzhus!

bos2008

ds vorletschte wuchenänd symer uf sydney ad biennale. äs hett usschtellige über di ganz schtadt - na ja, ä teil vor schtadt - vrteilt und alles isch gratis. mier hei us vor allem uf d cockatoo island konzentriert und nid amäu dert alli usschtellige gsi. aber schtatt itz gross mit wort ids detail ds gah, lahni d bilder lah schpräche... :-)

i üsem lieblingsjapaner, chli, äng, busy, aber sooooooooo guet!


dr james im paradies...




achtung, chli-druckts!


ha das ding nume per zuefall entdeckt und hätt nie dänkt, dass es so wichtig isch. d türe öffnet nämlech uf dr angere site und dr liecht/ventilator-schalter isch o ganz amene andere ort...


ufem wäg zur biennale. zum glück simer relative liecht greist, wül mr dr ganz tag üses gepäck mit üs umegschleppt hei.


äs touri-kafe mit touri-ussicht, währenddesse dr kenney ar klervi isch go ds opera house zeige.


u das si dr kenney u d klervi... merkt me, dass dr james nid gärn gfötelet wird? :-)
dr kenney isch denn zäme mit em james uf finnland u derte hei si d klervi kenneglernt. si isch us dr bretagne u hett o äs ustusch-architektur-semeschter in tampere absolviert.


akunft uf dr cockatoo island - grau u rägnerisch.


d usschtellige u inschtallatione si über di ganz insle vrteilt gsi. i alte fabrikhallene, tunnäll u schächt, ehemalige bürogebäude, agschtellte-unterkünft und diräkter-villene...








bevor me i das einte hus hett ine chönne, hett me are frou vrby müesse, wo eim gwarnt hett u bi teenager o dr uswys vrlangt hett. ke zuetritt für under 18 jährigi! zersch hani's chli lächerlech gfunde, aber när hani's vrschtande. läck, das isch würklech total krass gsi. und u schwierig zum beschriebe. ds meischte si video- u ton-inschtallatione gsi. meischtens sälbschtvrsuech vom künschtler, em mike parr. uf eim video hett er vrsuech so lang wie müglech dr atem azhalte. geit ja no. ufem nächschte hett er probiert, si finger so lang wie müglech über äre cherzeflamme ds häbe. dr finger hett afa zittere, isch schwarz wurde u hett afa blase wärfe, bis är ne ändlech wäg gho hett. u das alles in nahufnahm. imene andere video hett er sech mit äre nadle a fade a chopf gnaiht und so wyter und so fort und immer schlimmer und immer intensiver. irgendwenn isch's mr würklech zvil worde und i ha nume no use wölle! aber bis i de dr usgang gfunde ha! aaaaaaaahhh!!!


bi däm simer nid sicher gsi, öb's zur usschtellig hett ghört oder nid...


das wär eine vo dene aggressive birds...


bye bye cockatoo island - underdesse bi schtrahlendem sunneschiin.
.

$249 velobuess!!

dr james hett grad ä buess vo sage und schreibe $249 igfange! und zwar wül er mit em velo anere schtehende outokolonne vrby gfahre isch und bim schtop - nach nach rächts u linggs luege - abboge isch. ohni veloschtreife syg är ufem velo äs vehikel wie jedes angere o und müessi ir kolonne warte.....!!

är hett de o no müesse blase - äs isch mittag am eis gsi - und wo's resultat negativ isch gsi, hett dr polizischt gmeint, är gloubi das nid, dr james sig sicher uf öppis angerem. dä hett sech nid chönne vorschtelle, dass me ohni droge so 'aggressiv' cha velofahre. dr james hett de ä bluetprob abote....

die schpinne, oder?!

campylobacter

sorry für di langi funkschtilli. bi zimlech im schuss und ha mr zudäm letscht fritig no ä campylobacter igfange!!! mit äme falafel-wrap vom aldi....!!!! im momänt dünkt mi, das chäferli heig nid nume mi mage-darm-trakt befalle, sondern o mis hirni. aber das chunnt äuä vo mire nid sehr bedarfsdeckende ernährig: zwieback, schliimsüppli, rüeblipüree u öpfelmues... :-))

u das isch ne, dr campylobacter.... ar hett übrigens o ne blog, hani grad entdeckt: www.campylobacterblog.com :-)

murramarang

letscht jahr si mr scho mal derte gsi. denn zumal imene chlyne containerli, wo sech schtolz 'standard one bedroom villa' nennt.


letschts wuchenänd hei mr de i dr 'ocean spa villa' vrbracht. u-uuu!


spa heisst, äs hett ä sprudelbadwanne :-)


architektonisch und inneirichtigsmässig isch's nid würklech uf üsere wällelängi gsi, aber d'ussicht isch fantastisch gsi!!! sogar us dr wanne.... :-)








zum bade isch es ds chalt gsi, aber defür hetts o nid vil lüt gha. äs paar unvrdrosseni si zwar mit äme wetsuit is wasser toucht. bibberbibber. ig ha mit mit äme schtrand-schpaziergang zfridegäh.



und mier hei ä heizig gha!!! emu, wo se dr james de hett ds loufe bracht...

gartehäg

we dr meinet, das mier schwyzer gartehägli-wältmeischter si, de muessi nech leider enttüsche! d ouschtralier liebe züün und hage am liebschte grad ds ganze hus mannshoch i. überzüget nech sälber:

zersch äs paar moderati bischpil:




und itz fahts a. zersch dr anti-nachbare-zuun:












und hie dr anti-schpaziergänger-zuun: