aussie pride....

tönt irgendwie nach svp, oder?

üsi neu wohnig..... hoffentlich!

göht hie go luege: www.chantalmichel.ch/wohnung

isch si nid ä troum?!

we alles guet geit, wird das üsi nöi wohnig si!!!! drücket üs düme!!

falls dr grad ir nächi sit....

vor äme jahr....

... hett dr james sini abschluss-usschtellig gha. geschter simer ar usschtellig vom enzo gsi.


dr enzo hett eigentlech mit em james zäme schtudiert, hett aber eis fach müesse wiederhole und isch drum ersch itze fertig worde.


ig ha übrigens wieder bim modällboue gholfe. di zwöi chline wysse si mini :-) dises mal bini aber vorsichtiger gsi.... mini fingerbeeri si no intakt.


und ier gseht, äs isch wieder movember.....!!!

färnbediening

und ig ha gmeint, äs syg ä photoshop-witz gsi die färnbediening vom 11.11. .... aber was gesehni hüt bim lädele?

ds ändi naht

üsi heireis rückt immer wi nächer!

letscht wuchenänd hei mr d chündigung für d wohnig gschriebe (3 wuche chündigungsfrischt!), üses outöli inseriert u si go züguschachtle choufe. am wuchenänd vom 6. u 7. dezämber hei mr de ä wohnigsusvrchouf und ä wuche druf zügle mr zum james sine eltere. dert blibe mr über wiehnacht u neujahr bis mr am 10. jänner abflüge. juhui!

underdesse git's no einiges ds organisiere. das isch üsi to-do-wall :-)

iitrag für d chantal :-)

hoi chantal

willkomme uf mim blog! i drücke dr alli düme für ds schloss :-) und hoffe scho bald vo dier ds ghöre.

hie no äs paar föteli, dass dr äs bessers bild vo üs chasch mache.

liebi grüess
esther

reparature

sit mr i üsi wohnig inezüglet si, hei üsi hähne tropfet und d badzimmer dechi hett gschimmlet. und regelmässig hei si üs vrschproche, äs wärdi itz de gmacht. isch aber nie passiert....

wül d bsitzere d wohnig itz wott vrchoufe, muess si se natürlech chli lah zwägmache. und ändlech chöme d handwärcher!

das isch dr hahne ir chuchi. ds tropfe isch gäge schluss zum rünne worde. literwys wasser heisses wasser isch da ds becki abe gloffe. und üsi schtromrächnig isch doppelt so gross wie letschts jahr gsi, wül dr boiler ununterbroche hett müesse ufheize....


sit dr sanitär isch cho, rünnts ir chuchi itz nümm und im badzimmer lavabo nume no schporadisch.... :-)

das isch üsi badzimmer dechi. appetitlich, oder?! gseht in natura no vil schlimmer us.


vor zwöi wuche am sunntig abe lütet ä paul a u seit, är sig für die reparature zueschtändig. öb er morn am morge chönn cho? isch üs de grad chli ds churzfrischtig gsi und usserdem hani denn ä prüefig gha. so heimers ufe mittwuch am morge am 8i vrschobe. mier si äxtra früecher ufgschtande, dass mr beidi zyt zum dusche gha hei und s isch 8i worde, 5 ab 8i, viertel ab 8i, halbi 9i,... irgendwenn hani de ufghört warte. ig ha de dänkt, s isch äuä äs missvrschtändnis gsi und är hett vor wuche druf gredt. am mittwuch druf drum nomau ds glyche schpili. u wieder nüt! am donnschti hett er de wieder aglüte, si chäme am fritig ufe mittag. a vorder termin hett er sech nid möge erinnere....

am fritig mittag chöme de die zwöi 'handymen'. dr eint um d dechi ds schtriche, dr anger um ne ventilator ids badzimmerfänschter und a dampfabzug ir chuchi ds montiere. aber die hei de grad chli ä schock gha. obwohl dr james dr paul lang u breit übere zueschtand vor wohnig ufklärt hett, hett dise das sine mitarbeiter nid würklech witergleitet. si hei sech uf äs easy fritig nami jöbli gfreut gha, aber nichts da! dr eint hett de afa ds bad abdecke, nachdäm i alles usegruumet ha gha u dr anger hett än ewigkeit mit sim chef telefoniert u situation erklärt.



dass alles vil ufwändiger als erwartet u budgetiert isch etc etc. nach äre schtund oder so, hetts plötzlech gheisse, SCHTOPP! dr chef hett d bsitzere nid chönne erreiche und ohni absägnig vo de mehchöschte hei si nid wölle witerfahre. so hei si de halt alles wieder zämepackt u si wieder abzoge.

bi ja gschpannt, wenn mr ds nächschte mal vo ne ghöre...

schnee.....!!!!

obwohl alli säge, äs schnei auso mängisch o in canberra, hani di letschte zwöi jahr vrgäbens druf gwartet.

zwöi mal isch's nääch cho, ds erschte mal ganz am afang (im februar 2007), wo canberra vomene 'supercell storm' isch heimgsuecht worde. aber nid mit schnee, mit hagel!!


(c) Canberra Times
meh föteli hie: klick

und ds zwöite mal dise früehlig. über wuchene hett ei boumsorte schneeflöckli um schneeflöckli ufe wäg gschickt. so schön! leider hei si die böim underdesse als gsundheitsrisiko deklariert (wägem heurüüme...) und äs dörfe kener nöii me pflanzt wärde.

carbonmade portfolio

we dr weit chöiter ä erschte blick uf em james sis online portfolio wärfe:
www.jamesbatten.carbonmade.com

äs isch no under construction, git aber emu scho ne erschte idruck.

wienachtsgschänk

das isch uf em james sire wunschlischte.....

graduation ceremony

scho gli isch's sowit! hüt hani di bedingti (!) iladig zur diplomfiir übercho. afangs dezämber weiss i de, öb i definitiv iglade bi :-)

Wir kommen zurück und brauchen einen Wohnung!

Liebe Leute

Nicht mehr lange und wir sind wieder zurück im schönen Schweizer-Ländli. Damit unsere 'We-are-back-Party' an einem gebührenden Ort stattfinden kann, brauchen wir Eure Hilfe!

Wir (Architekt + Ernährungsberaterin, AU/CH, NR) suchen in Bern (vorzugsweise Altstadt oder sonst Länggasse, Lorraine, Breitsch o.ä.) ab ca. anfangs Februar 2009 (oder nach Vereinbarung) eine Altbauwohnung (+/- 4 Zimmer) mit Balkon, Terrasse oder Garten für max. CHF 2500.-

Meldet Euch, wenn Ihr von etwas wisst, damit wir unsere Wohnungsbesichterin losschicken können :-)

Merci viumau!!!

gschafft!

chume grad vo mire letschte prüefig! itz muessi ä monet uf d resultat warte u de hani's definitiv überschtande. underdesse wirdi aber wider meh zyt für blog ha....

üsi wohnig wird vrchouft!

geschter hani äs telefon vo üsere wohnigsvrwaltig übercho, dass d bsitzerin 'üsi' wohnig wott vrchoufe. und zwar per sofort. falls mr interessiert wäre, hätte mr vorchoufsrächt. nei merci!

d wohnig wird für $265'000 usgschribe. gschpunne! cha mr nid vorschtelle, dass öpper dä betrag für die wohnig i däm zueschtand (schimmel im bad, tropfendi hähne, defekti fänschter) u i dere finanzsituation wird härelegge.

i hoffe nume, das ganze duuret no chli oder emu dass der nöi bsitzer nid hie wott cho wohne. dr ligeschaftstyp vo geschter hett mr zwar gseit, dr bsitzer heig ä chündigungsfrischt vo 8 wuche (mier sälber hei 21 täg), aber är isch nid sicher gsi. und i üsem vrtrag schteit öppis vo 4 wuche....

pkc

pechakucha isch än alass, wo fründe vo üs organisiere. bim letschte mal isch ds fernsehe drbi gsi u we dr luscht heit, chöit dr öich d sändig aluege: pkc04 uf abc (eifach klicke u los geits)

d obelia isch än ex-arbeitskollegin vom james und ä yoga-fründin vo mier. dr glen isch ire partner. bi de minute 2.30 u 3.42 gseht dr dr john u d maree, d eltere vor obelia. dr john isch em james si ex-chef vo 'the expertclient'. vrschtreut über di ganzi sändig gseht dr dr will u dr kenney, wo beidi mit em james schtudiert hei. u we dr genau häre lueget, gseht er o üs ab und zue :-)

vil vrgnüege!

tidbinbilla

am samschtig bini a ne usflug wo d'uni für internationali schtudänte orgnisiert hett. dr erscht sit i hie bi... mier si mit äme murray's car i tidbinbilla naturpark, öppe 45 minute vo canberra, gfahre. i d ouschtralische alpe :-)

di ganzi tour isch sehr asiatisch gsi: mit em car zure sehenswürdigkeit, ä churze schpaziergang, vil föteli u wieder zrugg zum car.... :-)

üse car


39 internationali uc-schtudänte (fasch alli us asie u indie)


i bi di einzigi europäerin gsi...


ds wätter isch phantastisch gsi, chli windig, aber süsch perfekt


äs obliecht imene bsuecher-pavillon




ä wägwyser


'mini' erschte wilde emus!


schtei-formatione mit teilwys wichtiger bedütig für d aboriginals










ä schlange hani immer no keni gseh, aber drfür ä grossi echse...




eini vo dene überflüssige warninge....


ufem heiwäg heimr no ä schtop bim canberra deep space communication complex gmacht

floriade

d floriade isch DÄ event in canberra. dr commonwealth park bim see wird zum schtart vom früehlig ines bluememeer verwandlet. hani emu gmeint. ig ha mr vorgschtellt, dass dr ganz park blüeht. wie ne rosegarte oder so. aber d realität isch de meh wie ne chlini openair-bea gsi.

d floriade isch imene abghagete teil vom commonwealth park und je nachdäm wohär me chunnt, louft me zersch äs chürzers oder lengers zytli am hag entlang, bis me ine cha. dr itritt isch zum glück gratis...









alli bluemebeet hei än ouschtralische film zum thema gha


mi lieblingsschtand :-))

röschti

ja, hilcona-röschti!! vom aldi!! süsch het dr aldi ja näbem basissortimänt nume dütschi produkt im agebot: haribo, oblaten-läbchueche, würschtli im glas usw. aber letscht wuche, hei mr die röschti im sonderagebot-egge entdeckt und hei natürlech müesse zuepacke... :-))

üsi chinesische nachbare....

letscht jahr hei si poulets oder äntene trochnet, im momänt sis irgendwelche gmües.... :-)

ute

ig ha nech scho lang vom ute ('iut' usgschproche) wölle vrzelle. dr ute isch DAS ouschtralische outo. d ute appreciation society of australia :-) beschriebts wie folgt:

the ute is more than just a car. the ute is a thing of beauty. the ute is part of our national identity. the ute is an expression of one's lifestyle. the ute makes boys into men. the ute is australian.

und das isch de nid öppe ironisch gmeint!!! göt mal uf das ute-forum go luege....

aber itz muessi nech dänk ändlech erkläre, was ä ute isch. eifach gseit, ä ute isch ä pickup. wird aber, wül er so beliebt isch, nid nume zum bügle brucht, sondern o als freizyt und familie outo brucht und abote.

no genau 4 mönet u 14 täg...

... u de simer wieder deheime! geschter hei mr üse flug buechet. mier flüge hie am 10. jänner ab u chöme am 21. jänner in züri a. zwüsche inne mache mr no hong kong unsicher :-) juhui!!!

batterie entsorge....?!

hüt simer vo shop zu shop u hei üsi bruchte batterie wölle zrugg gäh. aber überall hei si gseit, sorry, nei, mier näme ke batterie zrugg. aber vrchoufe tüe si se überall...

vore bini de ufs internet, um d adrässe vore entsorgigsschtell ds finde. das hani de uf dr website vom 'department of territory and municipal services' gfunde:

Batteries (household) - There is no current collection system for household batteries. Battery World in Phillip will accept small quantities of household batteries for recycling at no cost. For larger quantities, costs apply. Contact them on 13 17 60. Otherwise, household batteries can be disposed of in your household waste bin.

was heisst äch 'small quantities'? mier hei äs chlyns säckli voll... und überhoupt, phillip isch nid grad ume egge, gäge ne halbschtündigi outofahrt vo üs deheime! vilech näme mr se de zrugg id schwyz und entsorge si de derte :-)))

fondue

letscht samschtig hei mr äs fondue gha!!

üsi fondue-mischig hei mr sälber müesse zämeschtelle, wül ds einzige fondue, wome hie cha choufe, isch äs gerber fertig-fondue. iiiiiih.

guete chääs ds finde, isch hie aber nid allzu eifach. u schwyzer chäs no vil schwieriger. im lädeli vis-à-vis hei si zum bischpil gruyère. $50 pro kg! und bi mother's nature - än art "deli" lade mit euro-food - hei si dütsche ämmetaler.... oohooo!



deli miz afüehrigszeiche, wül alles wo vo europa chunnt, also o äs gärber fondue oder än ikea-holunder-sirup, gilt outomatisch als delikatesse... :-))

üses fondue heimer de schliesslich mit äre mischig us schwyzer gruyère, dütschem ämmetaler, dütschem kirsch, ouschtralischem chnoblouch, mähl u wysswi zouberet. mmhhh!

lampige salat

chürzlech hani entdeckt, dass sogar salat hie äs vrfalldatum hett und zwar äs mindeschthaltbarkeitsdatum wie anderi haltbari nahrigsmittel wie zb uht-milch. itz weissi, wörum me hie chuum früsche, knackige salat findt.

dä salat hani zb am 11. ouguscht kouft und scho denn isch er nümm früsch gsi, sondern scho chli gummig zum alänge. und sini gschpänli si no bis zum 15.8. vrchouft worde! uiuiui...