bye bye arnold

am samschtig hett dr arnold, eine vo de wenige europäer a mire uni u dr einzig woni kenne (!!), sy abschiedsparty ghä. nach de prüefige geiter zrugg nach holland. wenn nächscht jahr nid öpper nöis chunnt, wirdi di einzige europäere ir ernährig sy. sniff.

näb äs paar schtudändte sy vor allem capeira fründe a sys fescht cho. und alli hei zum abschied no gäge ihn wölle aträte. ds zueluege hett gfägt, aber dr gsang hett eim mit dr zyt ufe geischt chönne gah!!

ds erschte föteli isch übrigens dr arnold. är rettet grad äs ameisli vorem vrtrample ;-))

pakischtanischi delikatesse

mier wärde immer no ab und zue mit pakischtanische delikatesse verwöhnt. vorgeschter isch d sadia mit drü vo dene dinger vor dr türe gschtande. chappati mit süessem griess und würzige kicherärbse. ä total schpezielli kombination: süess-salzig-würzig. aber u fein. mmmhhhh!

movember

hilfe!!! dr james wott sech ä schnouz lah wachse!!! iiihhh!!!! und itz hett er sogar no än usred drfür: movember. ä schnouz für ne guete zwäck... oje!

pool party

naja, s isch nid würklech ä party gsi, aber dr pool isch igweiht! und was für nes timing: letscht wuchenänd isch ds erschte wuchenänd gsi, wo d temperature gäge 30°c ufeklätteret si. juhui!!!

leider isch d schtoky än ungloublechi wasserrate und chas nid ertrage, dass anderi bade u si nid. u drum hett si halt o dörfe schwümme... mi hett's ziemlech gruset, aber als einzige nid-hündeler hani natürlech nüt ds säge gha :-)

si heisst übrigens schtoky wägem stockinger us dr alte kommissar rex-serie. die isch hie total erfolgrich und si zeige se sit jahre ir originalfassig mit untertitle.

joey

das chlyne würmli, wo so härzig useluegt, isch ä joey. so heisse di junge känguruh. däm rudel symer am sunntig bim schpaziere begägnet.

property inspection

am mäntig hei mr di erschti wohnigsinspektion gha. d verwaltig chunnt so ca. all 6 mönet dr schtand vor wohnig cho inschpiziere! circa ä wuche im vorus hei mr äs schriebe übercho, wo si sech agmäldet hei und ä 'routine inspection guide' bigleit hei. hie äs paar uszüg:

- the property is very clean and tidy throughout with any stains removed from carpets
- all cupboards, shelves, drawers and benches are cleaned
- walls and doors are cleaned of all marks
- stove, griller, oven and exhaust fans are cleaned
- windows and sills are cleaned inside and outside where possible
- all garbage, bottles and rubbish is removed from the premises
- bathrooms are thoroughly cleaned, with all mould and soup scum removed from tiles and grouting. ceiling mould must also be removed. toilets to be cleaned inside and out, and the bathroom floors to be mopped

ha ne ziemleche schock gah, woni die lischte gseh ha! isch ja wie bire wohnigsabgab...! dr james un ig hei de uf jede fall dr sunntig abe mit putze vrbracht. är hett d chuchi putzt, i ds bad. d fänschter, chuchichäschtli u schublade hei mr de aber beidi total übertriebe gfunde u lah sy. mit em teppich sy mr üs nid einig gsi. für mi wär schtoubsuge gnueg gsi. dr james hett aber gfunde, mier sötte no öppis gäge di verschiedene fläcke undernäh u hett dr fläckespry afa extensiv isetze. äs hett gnützt. d fläcke si itz wäg. meh als wäg. dr teppich isch itz gschpränklet mit ufghelleti schtellene :-))

d inspektion sälber isch ä churzi sach gsi. i kem verhältnis mit em putzufwand. aber wenigschtens hett si nüt zum ussetze gha. si isch sogar sehr nätt gsi. ds nächschte mal wärde mr äuä nümm so intensiv putze...

d farm

am james syni eltere, d candy u dr len, hei letscht jahr äs hus u land öppe ä schtund usserhalb vo canberra kouft u si i di ouschtralischi pampa züglet. wül's so völlig im gaggo usse isch, nenne mr's d farm. grad vrgangnigs wuchenänd sy mr wieder mal dusse gsi. si si geng chli öppis am wärche. ds letschte projekt isch ä swimming pool, wo scho gli sött ready si. di nächschti idee isch, dass d candy ä chueh möchte. äs gschpändli für d dusta :-)) bi gschpannt....

pecha kucha

letscht mittwoch simr am erschte pecha kucha alass in canberra gsi:
http://pechakuchacanberra.blogspot.com/

hett gfägt! normalerwys präsentiere 20 lüt je 20 slides à je 20 sekunde. ds thema isch design. wül's dr erscht alass gsi isch, hei sech no keni 20 lüt zum präsentiere gmäldet. aber das wird scho no.

d'obelia u dr glen plane scho dr zwöit alass. ufere dachterrasse, inere summernacht...

duck attack

itz föh o no d änte afa düre dräihe! geschter ufem wäg zur uni (ja, am samschtig!), bini anere änte vrbi gfahre, wo näbem velowäg im gras gsässe isch. das hett dere änte anschiinend überhoupt nid passt. si isch ufgflatteret und hett mi vrfolgt. ig ha iri flügel a mim rügge gschürt u dr schnabel am hinderchopf. blöderwys, hani grad geschter äs ungrads mal vrgässe dr helm azlegge...
ar uni de, hani mit öpperem über magpies und änte gredt. dise isch chürzlech uf äme schpaziergang ganz ghässig vo ämene boum obenabe vonere änte agschnatteret worde....! gschört, oder?!

the birds

i weiss itz, wörum hie helmpflicht isch! wül me hie vo 'the birds' attackiert wird! s passiert immer am glyche ort ufem wäg zur uni, weni vor quartierschtrass i waldwäg abbiege.

ds erschte mal hani gmeint, irgend öpper schiessi mit äme flobi uf mi. ha aber niemer entdeckt. ds nächschte mal hani näbem 'schuss' o ä vogel ghört vrby flitze und ha drus gschlosse, dass äuä öpper uf d vögel schiesst un i irgendwie id schusslinie chume. ig ha mr scho überlegt, öb i äch i zuekunft än andere wäg sött näh. aber underdesse isch klar, äs sy d vögu womi attackiere!! letscht fritig hani di lengschti zyt am schatte am bode gseh, wie mi das viech vrfolgt hett. mängisch hacke si chly ufe helm, mängisch mache si o chlepfendi tön wie gwehr-schüss oder mängisch vrfolge sy eim nume.

itz woni weiss, was es isch, macht's mr nüt meh us. ha ja ne helm :-)

d vögel heisse übrigens magpies u gseh us wie ne mischig zwüsche chräihe u elschtere: magpie (-> 'swooping'!)

james...

ha grad realisiert, dass dr james chli ds churz chunnt i mim blog. uiuiui. chunnt äua drvo, dass är im momänt fasch tag u nacht ar uni isch u a sym abschlussprojekt schaffet ... s'isch aber absehbar. är muess no bis mitti novämber dürehalte u de isch er ä master of architecture :-))

brigalow court

wie's i dr unit 25 usgseht, wüsset er underdesse. um nech no än idee vom rundum ds gäh, hie äs paar föteli vom brigalow court. äs sy 8 u-förmig agordneti blöck. ir mitte sy deckti parkplätz u d wöschchuchi. üsi unit 25 isch im parterre am egge vomene block am undere ändi vom 'u'. vo chuchi, bad u büro luege mr i innehof, vo schtube u schlafzimmer ines chlyns pärkli mit chinderschpilplatz. zwüsche üs und em pärkli hetts aber ä chlyni bambushecke. so gseh nid grad alli diräkt id wohnig.

das pinkige velo, wo dr bim briefchaschte gseht, isch de übrigens mis! genau mi farb, oder nid?

und die lufttrochnete hüehner (oder änte?) vor üsem bürofänschter sy vo üsne chinesische nachbare vo obedranne :-))

unit 25

s nimmt nech sicher scho lang wunder, wie üsi unit 25 so usgseht... :-) drum hie äs paar föteli vo üsem chlyne riich:

üsi wöschchuchi

hüser u wohnige wärde hie normalerwys ohni chüehlschrank, gschirrschpüeler, wöschmaschine u tumbler vrmietet. üsi siedlig hett aber zum glück ä gmeinschaftswöschchuchi, so hei mr üs nid no ä wöschmaschine müesse zuetue. d suechi nach äme günschtige chüehlschrank isch scho gnue lang gange... heilsarmee brocki sei dank, hei mr de ä chlyne chüehlschrank für $25 gfunde. 'chly' isch zwar äuä chli undertribe. är isch winzig. ä richtige jöööh-chüehlschrank. aber besser als nüt.
d wöschchuchi isch chli wie ne wöschsalon. $2 ine schiebe, 30 minute warte u d wösch isch gwäsche. üswähle cha me zwüsche me chalt, warm u heiss programm. ds wasser isch aber nie meh als warm. also eigentlech sys drum nume zwöi programm. aber zum glück si hie desinfektionsschpüeler genau so vrbreitet wie weichschpüeler u so wird d underwösch o mit nume lauwarmem wasser wieder früsch :-))

vom winde verweht

ha mal wieder chli müesse grossschtadtluft schnuppere. bi drum vom samschtig bis mäntig abe d vivi in sydney go bsueche. dert hani ds warme (aber windige....) wätter gnosse und ha mr vo dr vivi di beschte plätz lah zeige.
am samschtig abe hei mr drinks i zwöine kule bars in surry hills gschlürfet (bis mr schlächt isch worde...), am sunntig morge si mr ar sunne go zmörgele, de ar crown street go second hand shoppe, sy när düre bondi market gschlenderet, hei üsi bei am bondi beach usgschtreckt, ä spaziergang entlang dr küschte gmacht und si zum abschluss go nepalesisch znacht ässe. d vivi hett am mäntig leider wieder müesse go schaffe un ig bi de no älei uf d pischte bis i wieder ufe bus nach canberra ha müesse.