panties for peace

so ne geniali idee :-))) anschiinend sy d machthaber in burma extrem aberglöibisch u ds berüehre vo underhose roubt ne ihri chraft. schicket also all öii ustragne underhose zur nächschte burmesische botschaft!!!

meh infos u adrässene hie: panties for peace

lube mobile

hüt isch vrwöhntag für üses outöli gsi. ds lube mobile isch cho :-)

ds lub-mobil isch än outomech uf schtör, wo eim dr service deheime chunnt cho mache. total bequem. itz hoffe mr natürlech, dass es für nes zytli fertig isch mit schtottere und quiitsche.

ä typische tag inere typisch ouschtralische familie...

us dr letschte sunntigsusgab vom the sun-herald:

A portrait of a day in the life of a typical Australian family (lets call them Michael and Julie Jones, their daughter Jessica, 19, and their son Ben, 14):

The Joneses wake up and head for the bathroom, where they wipe with Kleenex Cottonelle, shampoo with Pantene mier schamponiere mit em aldi and deodorise with Rexona. Michael shaves with Gillette wie dr James and Julie and Jessica insert Libra ig o.

In the kitchen, Ben feeds Whiskas to Soxie and Pedigree Pal to Max, and spreads Vegemite on toasted Tip Top for himself wieder wie dr James. Michael and Julie pour Paul's into their Nescafe Blend 43 and over their Weet-Bix.

Jessica swallows a glass of Golden Circle pineapple and a tub of Yoplait. On the way to her bus, she smokes a Winfield (the first of her four for the day) and chews an Extra so her breath won't smell bruche mr o ab und zue.

Julie puts on a load with Omo, makes Ben a sandwich with Bega cheese and Hans salami, and drives him to school in their silver Holden Commodore.

For lunch Julie makes herself a can of Campbell's. Jessica has an Uncle Toby's muesli bar and a couple of squares of Cadbury's mier hei lieber Schwyzer Schoggi. When he gets some from school Ben has a packet of Smith's and a glass of Milo und Ovo. When she gets home from work, Jessica has two Tim Tams hmm ja, die sy fein! and a can of Diet Coke. Julie's afternoon tea is Arnott's Shapes.

For dinner, Julie makes a sauce with Leggo's tomato paste, McCain frozen peas and John West tuna, to put over San Remo rigatoni. Michael drinks a can of VB, Julie has a glass of Jacob's Creek chardonnay. For dessert they eat Goulburn Valley tinned fruit with Peter's icecream.

Julie covers the leftovers with Glad, to avoid attracting cockroaches (although she sprays with Mortein once a week uiuiui, müesse mier zum glück nid). They wash up with Finish and brush with Colgate. Then they watch TV, using a remote powered by Energiser.

Jessica goes out for a drink with her boyfriend and they end up at his place. If he used a condom, it would be Ansell, but he doesn't, so in ten months time Jessica will be buying Huggies.

eurovision

dier wärdet's nid gloube, aber eurovision isch hie fasch ä kult! dr james un ig sy zumene kollegepärli iglade gsi um zäme eurovision ds luege... :-)) und so hani geschter abe ds erschte mal i mim läbe (oder emu solang i mi zrugg erinnere cha) än eurovision final vo a bis z gluegt.

und i muess säge, äs hett gfägt! vor allem wül di ganzi show ja würklech ä totale witz isch, aber d lüt se anschiinend völlig ärnscht näh. mini favorite si frankrich, bosnie-herzegowina u kroatie gsi. hei aber leider nid gwunne.... sniff.

we's nech interessiert, wie d ouschtralier abgschtumme hätte:
www.sbs.com.au/eurovision

und wär süsch äs paar eurovision-statistike dürescrolle wott:
www.songcontest.ch

Paco Peña

letscht samschtig isch dr paco peña mit sire aktuelle flamenco show uf canberra cho. isch oder wär u-schön gsi, nume ds publikum isch leider chli dischtanziert gsi. chli sehr dischtanziert sogar, vor allem am schluss. i bi völlig schprachlos gsi. am schluss vor vorschtellig hei sech vore uf dr bühni alli vrbeugt und d sängerin, än elteri ziemlech rundlechi gitana, hett no churz äs paar schritt tanzet. total heiss. u de si si ds erschte mal ab dr bühni.... u das isch de o grad ds letschte mal gsi! chuum isch d bühni läär gsi, hei grad sofort alli ufhöre klatsche, si ufgschtande u drvo gloffe. ig ha's würklech fasch nid chönne gloube!!! ig hätt no ewig wölle wyterklatsche und si wäre sicher no eis oder zwöi mal zrugg uf d bühni cho. aber s hett nid sölle si. tja, irgendwie passt's zu canberra....

ouschtralischi vorgärte

das isch ä typische ouschtralische vorgarte. troche, bruun und gnutzt höchschtens als parkplatz. und wül's i absehbarer zuekunft mit em räge äuä nid vil besser wird wärde, cha me sech itz ä plastik-kunschtrase 'apflanze'. das gseht de öppe so us:



ufem foto mags ja no relativ natürlech usgseh. aber in natura isch es würklech knall-grüen und kitschig-glänzend. äs fähle nume no d gartezwärge....

luke batten

falls es nech interessiert, was em james si 'chlii' brüetsch so macht:
http://www.lukebatten.com

si anger brüetsch, dr lee, hett leider ke eigeti website. drum hie dr link zum club woner schaffet:
http://www.revolverupstairs.com.au

qual der wahl

2 vorschtelligsgschpräch (eis am 9i u eis am 10i hüt am morge) + chli vitamin b = 2 jobs + 1 schtund um sech ds entscheide....

wie's usgseht, wird er scho am mäntig si neu schtell bi hbo+emtb aträtte und hüt abe äs letschts mal is fritig fyrabe bier mit tec. so schnäll geit's! vowäge relaxti ouschtralier....

vorschtelligsgschpräch

dr james hett hüt am morge zwöi vorschtelligsgschpräch. zersch geiter zu cox u de zu hbo embt. drücket alli düme!

u hüt isch o scho si letscht arbeitstag! 2 wuche chündigungsfrischt gö schnäll ume... theoretisch wäre di 2 wuche zwar ersch am zischtig vrby, aber si si froh, wenn si möglechscht rasch ke lohn me müesse zahle und är isch froh, dass er di 'ds vil' bezogene ferietäg nid muess nacheschaffe.

tango futur

am samschtig abe isch tango agseit gsi. im rahme vom 'canberra international music festival' - tönt guet, oder? :-) - hei 'tango futur' äs konzärt gäh. GENIAL!!!!

dr erscht teil vom konzärt isch nume zum lose gsi, während em zwöite teil hett me de chönne drzue tanze. aschliessend isch ä tanzperformance ufem programm gschtande. ds konzärt inkl. performance isch für 2 schtund agseit gsi. aber die musiker hei eifach ds gärn gschpilt!

am halbi zwölfi, nach 3 1/2 schtund, hett se d vranschtalterin müesse schtoppe. hett äuä ids bett wölle gah. so schad! i hätt no schtundelang chönne zuelose u zueluege. sälber ds tanze hei mr üs leider nid gwagt. üsi schueh hei mr zwar mitgnoh, aber mit üsne paar grundschrittli wäre mr üs chli drnäbe vorcho zwüsche all dene enthusiastische tango-tänzer. vilech, irgendwenn....

wiehnachtsgschänkli

nume no 7 mönet u scho wieder wiehnacht. höchschti zyt also um ad gschänkli ds dänke! sit geschter chöme hie am fernseh scho wieder tvspots für wiehnachtsgschänkli. chrisco wirbt für si nöi 'toys and gifts' katalog.

chriso isch ä firma, wo me jede tag oder jedi wuche ä betrag cha izahle und sech so sini wiehnachtsgschänk und ds wiehnachtsässe cha 'vorfinanziere'. ar wiehnachte wird de alles ganz bequem hei gliferet. emu we alles guet geit. letscht jahr hei si liferängpäss mit em ässe gha u jenschti lüt, wo während em ganze jahr uf wiehnachte gschpart hei, si läär usgange. ups.

bricht vrscholle

die paar letschte wuchene si zimlech schtressig gsi ar uni. ha diversi brichte müesse fertigschtelle u abgäh. eine drvo hätte mr de vorgeschter sölle zrugg übercho. und alli andere hei ire o übercho. nume ig nid. d dozäntin hett öppe glich gschockt wie ig usgseh. ersch bim zrugg gäh hett si realisiert, dass si mi bricht gar nie hett gseh!

ha scho lang befürchtet, dass das mal passiert. im erschte semeschter hei mr d brichte immer bim sekretariat igreicht und ä beschtätigung übercho. underdesse müesse mr se nume no ine box wärfe u hoffe...

zum glück hett si mr gloubt, dass i mi bricht o würklech abgäh ha. süsch chämi nämlech für jede vrpasste tag ä notepunkt abzug über. und zum glück macht me hützutag alles mit computer und git nid eifach ds einzige exischtierende original ab. so hani ire mi bricht de chönne maile und muess itz halt eifach chli lenger als di andere uf mi note warte.

ups...

'ig ha good news u bad news. good news isch, i wirde meh zyt für di ha. bad news isch, tec müesse mi entlah, wül ne d'ufträg usgöh.'

das isch am zischtig abe gsi.

underdesse hei sech scho äs paar türene uftah. dr john, si chef, hett gmeint, vilech chönne si ne glych bhalte und ne projektwys a anderi büro uslehne. bim büro vis-à-vis, quattro design, chaner sech bim chef, wo normalerwys ds sydney, disi wuche per zuefall aber in canberra isch, go vorschtelle. und morn hett er no äs gschpräch mit äme andere büro in canberra.

geit alles chli schnell, muesses aber o, wül d chündigungsfrischte si hie nume 2 wuche!

tango zum zwöite

äs paar möge sech erinnere, letscht jahr hei mr agfange tango ds tanze. na ja, tanze isch chli übertribe. mier hei i 8 lektione äs paar grundschritte glehrt. aber immerhin...

mier hei de aber nachem afängerkurs nid witergmacht, wül dr james ke zyt me gha hett.

womer letschthin mal äs paar takt hei wölle tanze, hei mr üs müesse igeschtah, dass mr alles vrgässe hei. ha's fasch nid chönne gloube! so ne enttüschig.

drum, hei mr üs itz wider igschriebe und föh nomal vo vore a. u mier si nid ämau di einzige, wo ne wiederholig bruche!

mal luege, öb sech ires motto 'if you can walk you can tango' dises mal bewahrheitet....

9 täg deheime

di vordere zwöi wuche hei mr vorläsigsfrei gha und mier si schnäll als überraschigsgescht id schwyz anes familiefescht jettet. sorry a alli, wo mr nid hei chönne gseh (was wohl di meischte si), aber 9 täg göh halt sehr schnäll vrby. hie zum troscht äs paar föteli.


bim häreflüge hei mr zwöi täg ds seoul gschtoppet und äs hett sech glohnt. ä cooli schtadt mit äme mix us traditionell u modärn.


heimer entdeckt, womer per zuefall id houptprob vo traditionelle feschtlichkeite gloffe si.


ds ässe gseht nid nume guet us, sondern isch o guet. und SCHARF!


und äs git ö chindertäller


und dütschi spezialitäte :-)


anderi kulinarischi köschtlichkeite si de aber chli frömder.


vorher....


nachher....
cha o nume mier passiere, grad ir erschte nacht uswärts ds zahnbürschtli ids wc la gheie!


dr james b. mit sire schpiilzüg-pischtole, woner in seoul für umgrächnet 3 schtutz kouft hett. d fröid isch aber vo churzer duur gsi. bim iireise in sydney hett er se müesse abgäh. äs hätt ja chönne si, dass er drmit ä bank überfallt......

bibber bibber

d chälti hett wieder izug ghalte. ha gmeint, dieses mal sygi besser druf vorbereitet, aber denkste. i bi eifach ä gfröhrli. dusse isch's tagsüber no gar nid so chalt u dür d nacht ersch fang einisch under null, aber dinne füehli mi wie imne chüehlschrank! i sitze meischtens mit voller montur (uggboots, winterjagge u chappe), wulledechi u bettfläsche am computer. söttet mi gseh!

krücke III

underdesse brucht er zwar ke krückene me zum loufe, aber äs ändi vo dere gschicht isch no nid i sicht. am samschtig simer abe uf deakin, ä suburb vo canberra, zum canberra imaging centre gfreset und em james sis chnöi hett äs mri übercho. leider laht sech d ärztin keni resultat lah zueschicke, d praxis syg ds chli..... so müesse mr itz disi wuche nomal dert abe, um d resultat go abzhole, wül si hei se üs natürlech o nid grad chönne gäh. hoffe itz eifach, mier müsse nid allzu lang warte, bis mr de wieder ä termin bir sportärztin hei....

award winning

the expert client, ds architekturbüro wo dr james schaffet, hett geschter ä wettbewärb für nes affordable housing projekt gwunne. d überzyt am abe und am wuchenänd hett sech also glohnt!

details sy uf der tec site ds finde.

krücke II

so, hüt hett dr james also si termin bim sportarzt gha. vorhär hei mr no schnäll as andere ändi vo canberra müesse go d rönggebilder vo letscht wuche hole. d judith, d ärztin, hett de äs grissnigs chrüzband am rächte chnöi diagnoschtiziert und ihm än überwysig für nes mri gschriebe, wül si vrmuetet, dass zuesätzlich o no dr meniskus gschlisse isch. än operation empfiehlt si i jedem fall, aber wül mr ke privatvrsicherig hei, chunnt er uf ne wartelischte u muess mindischtens äs jahr oder anderthalb uf d operation warte. uff!

die konsultation hett üs $134 koschtet. am samschtig isch de ds mri agseit, das si $300 u de nomal ä termin bir judith, dh nomal $134. 50% vo de arztchoschte wärde vo medicare, das isch ds öffentleche gsundheitssyschtem hie, übernoh. die andere 50% und ds mri leider nid..... tja, that's life! fortsetzig folgt.

the national public toilet map

www.toiletmap.gov.au

ja, so cha me nid nume usflüg und übernachtige, sondern ou bisipousene ganz bequem im vorus plane.... :-)))

$12 pro schtund

$12 pro schtund pizza usliefere - anschiinend dr höchscht asatz i däm gwärb. drvo abzieh muess me de no ds benzin u ds outo oder dr töff muess me sälber organisiere. kes zuckerschläcke....

krücke

dr james isch ä krücke.... hihi, uf jede fall hett er itz krückene!

letscht zischtig abe isch er wieder mal go schutte. indoor, chlyns fäld, weiche ball u vrbissni hobbyschütteler, ums churz zäme ds fasse. und jedes mau chunnt er irgendwie lädiert hei. blattere, blöiele, gschwullni nase.... u letscht zischtig humpelnd. är hett meint, är heig underhalb vo sym rächte chnöi öppis useploppe gseh u d kollege hei ä knack ghört. ups.

mier sy de is bett, hei sys bei höch glageret, iis ufgleit u ghoffet. aber am nächschte morge ischs natürlech no überhoupt nid besser gsi. so symer de nach mire vorläsig is schpital gfahre und im chalte wasser vom ouschtralische öffentleche gsundheitssyschtem glandet.


is schpital mit äre schufle, dürs schpital im rollschtuehl und usem schpital mit krücke

mier hei üs agmäldet u üs ufe langi wartezyt igrichtet. das isch de aber zersch gar nid so schlimm gsi. scho nach äre guete halbschtund hett üs ä physiotherapeutin abgholt. si hett sys chnöi undersuecht und üs de is röngge gschickt. dert hei mr de fasch 2 schtund gwartet. uff. när wieder zrugg zur physio. broche isch nüt gsi, si hett gmeint, äs syg dr meniskus. wäg dr schwellig hett si aber ke 100% diagnose chönne schtelle. und wyteri teschte wärde im schpital nid gmacht.

so hett dr james de zwöi krückene und än ädrässlischte mit sportmediziner u orthopäde übercho. die würdi de wyteri undersuechige dürefüehre und möglechi behandlige vorschla. uf ne operation müessi mr aber sicher eis bis anderthalb jahr warte!!! das sy die berüehmt berüchtigte warte lischtene hie in ouschtralie...

na ja, morn chaner itz zumäne sportarzt u de gseh mr de wyter.

glungge

drum bruchi hie gummischtifle! scho nach äme churze u nid allzu schtarche räge gsehts hie so us....


di normalerwys furztrochene stormwater drains fülle sech mit erschtunlecher gschwindigkeit


und d velo- und fuesswäge wärde zum hindernislouf...






bi dere chrüzig muess me albe mindeschtens 5 meter zruggschtah, um nid wie ne begossne puddel ds ände. d kunscht isch, dr richtig momänt ds finde, um dr chnopf go ds drücke, dass de ds fuessgängerliecht o mal uf grüen schaltet....

cabin

am james sini eltere hei uf äme campingplatz i de snowy mountains äs container-hüsli. ds hüsli schteit ar vorderschte front am lake eucumbene. emu theoretisch, we dr see voll wär. wäg dr ahaltende dürre isch dr wasserschtand extrem tief u me cha froh sy, we me dr see no gseht!


das füdli ghört übrigens am luke :-)


unne bir schtrass wär normalerwys ds ufer


und hie si albe d fischerboot igwässeret worde


so gsehts ufem seegrund us. mutierti wasserpflanze?


dr james am holzhacke ..


... und när vor em fürli am game


zrugg uf canberra

happy easter

frohi oschtere öich allne. mier fyre oschtere hie im herbscht und schtatt em has chunnt ab und zue o äs bilby.... aber bi üs hett natürlech di dütschi änte vom aldi nid dörfe fähle :-)

earth hour

machet o mit bir earth hour!

id

das mit de graue haar cha no nid so schlimm sy. hüt bim ichoufe hani müesse d'id zeige, wül dr vrchouf vo alkohol a under 18 jährigi illegal isch.....

grau

itz isch es ou bi mier sowyt. underdesse hani sicher 5 graui haar! i de letschte jahr hani ab und zue äs vreinzelts entdeckt und meischtens usgschrisse. aber meh als eis hani nie ufs mal entdeckt. aber die zyte si anschiinend vorby. ig ha immer gseit, i freue mi uf die graue haar, wül i denn mini haar besser färbe cha. mini si ja vil ds dunkel, um ohni aggressivs bleiche, ä cooli farb häre ds bringe. aber itz bini nümm so sicher. sniff....

huntsmen

läck, i letschter zyt chunnts mr vor äs wärdi vo dene viecher vrfolgt. langi zyt hani chuum eini gseh, aber im momänt...

grad vore, woni ha wölle go poscht hole, hani äs halbtots ding vor dr hustür, zwüsche richtiger tür und gittertür, entdeckt. drbi sött üs die gittertür vor söttige krabbeldinger bewahre!!!

u vor drü wüche isch eini vo dene ar wand obe kläbt, woni is yoga gah. entschpannend isch das uf jede fall nümme gsi. und wül üsi yoga-session imene buddhistische träffpunkt schtattfindet, chämts natürlich niemerem i sinn, das ding ds entfärne, geschweige denn ds töffle. und so isches itz immer no derte u jede mittwuch abe, muessi all paar minute d position am abchecke um mi abzsichere, dass das teili nid än agriff uf mi schtartet...

u eismau, wo mr nach äme openair kurzfilmfestival zrugg zu de outo si gloffe, rüeft irgendöpper vo hinne "don't move!" und wädlet mit äre zitig über dr obelia's rügge. d erchlärig isch de gsi, si heig ä riesige schpinnele uf irem rügge gha! mi tschudderets immer no, weni dra dänke.

ou ja, u womer ändi jänner vo üsne ferie si heicho, gäge mitternacht, bini uf di brillianti idee cho, dr briefchaschte go ds checke. und natürlech sitzt eini vo dene schpinnele grad uf üsem chaschte. i ha mi ganz muet zämegno und se mit äme eschtli vrsuecht ds vrtribe. ha aber angscht gha, se ds berüehre, wül si hätt mi ja chönne agumpe oder übere ascht im mini richtig chönne chrable. iiiihhh!!! und so hani mit däm eschtli eifach immer wieder gäge dä briefchaschte gwädlet. aber alles, wo drmit erreicht ha, isch gsi, dass i d nachbare ufgschreckt ha, wo mi de dürs fänschter düre hei afa abägge, wül si gmeint hei, i chloui iri velo, wo ad briefchäschte akettet si gsi. und d schpinnele isch us angscht düre schlitz i briefchaschte ine krablet. i üse briefchaschte! uf üsi poscht! super! i ha de poscht lah poscht si u bi wieder ine gange.

moral sense test

im rahme vo mire ethik vorläsig hani än online moral sense test usgfüllt und ha 2.2 punkt erreicht. machet ne o. nimmt mi wunder, wie angeri abschnide.

online vorläsig

geschter hani mini erschti online vorläsig gha. ig ha uf dr uni-website äs chlyns file abeglade und mit äme spezielle programm 'elluminate' uftah. und scho erschallt d schtimm vor dozäntin usem lutschprächer und ihri folie drzue erschine ufem bildschirm. scho cool.

d dozäntin isch inderin und hett ä ziemlech schtarche akzänt. mängisch vrschtah ni se albe chuum. aber das isch ja so zum glück überhoupt kes problem. i schpuele eifach chli zrugg u lose's nomau....

gummischtifle?

ja, die brucht me o hie, ufem tröchnischte kontinänt... äs rägnet zwar nid extrem vil, aber we's rägnet, de meischtens für lenger u wül hie alles uf dürri igrichtet isch, sy d schtrasse u trottoir de meischtens grad gli u tüchtig überschwemmt. nachdäm i itz scho äs paar mal pflotschnass u mit ufgeweichte u je nach schueh igfärbte füess bi heicho, hett's eifach müesse sy. ig ha mr müesse gummischtifle choufe!

the expert client

the expert client, das isch em james sys büro. also eigentlech em john sys ;-).

sys erschte projekt isch än um- und abou vomene eifamiliehüsli. drzue schaffet er mit dr obelia no amene wettbewerb für 'affordable housing' (drücket ne d düme!) und beguetachtet (u närvt sech ab) bou-igabene. är chönnt gloubs scho äs buech über idiotie und planigsfähler schribe...

back ar uni

letscht wuche - nach fasch 4 mönet pouse! - hett d uni wieder gschtartet. nomal 2 semeschter à 15 wuche - inkl. je 2 wuche ferie :-) - u de isch's überschtande.

dises semschter hani 3 vorläsige (consumer behaviour / research design for health practitioners / ethical and professional issues) ar uni ds canberra und 1 vorläsig (trends and innovation in food science) online übers internet ar deakin uni ds melbourne. im consumer behaviour bini umzinglet vo marketing-lüt, im research design vo chrankeschwöschtere u hebamme und ir ethik vo angehende lehrer und psychologe. bi ja gschpannt, was für lüt bim erschte online-tutorial vor food science vorläsig uftouche oder besser gseit ufem bildschirm uflüchte...

reisebericht: 7. u letschti etappe (21.1.08-23.1.08)

in sydney, üsere letschte etappe hett's de wieder abschied näh gheisse. schluchz. aber äs geit ja itz nid ämau me äs jahr u de chöme mr wieder hei...


di wichtigschte sehenswürdigkeite vo sydney uf ei tätsch: hafe, brügg u opere

reisebericht: 6. etappe (17.1.08-21.1.08)

ds tasmanie si mr uf interlake. hei nid chönne widerschtah. obwohl dr james gmeint hett, äs gäb sicher nid vil ds gseh... tja, är hett rächt gha: ewigi schotterschtrass u de ändlech drü verfalleni hüser zwüsche zwöi seene. that's it. de wieder via schotterschtrass zrugg. föteli hei mr kes gmacht.

ds highlight isch ä jetboat tour entlang dr küschte vo bruny island gsi. zersch hei mr aber mit dr fähri übere müesse.






läck die seelöie hei gschtunke!!!!!


bim zruggfahre hei üs de no äs paar delphine begleitet.


hie hetts am morge albe pinguine. aber mier si ds schpät drann gsi. und ig ha sowieso nüt gseh. bi im outo am schlafe gsi. die anti-schlächt-pille für ufs jetboat hett mi umghoue. aber schlächt isch mr nid worde :-)

reisebericht: 5. etappe (15.1.08-17.1.08)

zrugg nach melbourne as australian open, emu d eltere, mier hei wieder d schtadt gnosse.

reisebericht: 4. etappe (11.1.08-15.1.08)

4 täg great ocean road. d road isch nid so great gsi...


dr ocean bzw. d küschte umso meh








meischtens hetts gluftet wie gschtört und isch o ziemlech chüehl gsi. ouschtralische hochsummer....


mängisch isch d schtimmig chli schwierig worde. da hett üs dr james albe nume no vo hinde gseh... oder mier hei ihn gar nümm gseh.






vo dene kakadus hei mr albe scharewys gha. di wüsse genau, wo's öppis ds ässe git.


üse erscht koalabär hei mr mitts in lorne ufe me boum bim touri-office kreisel gseh. hei üs gfragt, ob da äch nachegholfe worde isch. när i de eukalyptuswälder hetts nume so gwimmlet vo ne.


jööhhh, äs baby....!!!!




i de wälder...




und o über de wälder hett me wunderschön chönne go schpaziere